आतङ्ककारी वा अन्य आपराधिक गतिविधिबाट आर्जित रकम लगानी भएको हुनसक्ने आशङ्का गर्दै नेपाल राष्ट्र बैङ्कका एकजना उच्च अधिकृत नाम उल्लेख नगर्ने सर्तमा प्रतिक्रिया दिँदै भन्छन् – “वेस्ट इन्डिजबाट भएको लगानी कति स्वस्थकर छ भन्ने कुराको निर्क्यौल गर्न जरुरी छ ।”
नेपालमा सर्वाधिक प्रत्यक्ष वैदेशिक लगानी वेस्ट इन्डिजबाट भएको पाइएको छ ।
उद्योग, व्यापार एवम् औद्योगिक क्षेत्रमा लगानी गर्ने देशका रुपमा मुलुकमा विरलै सुनिएको उक्त राष्ट्रबाट प्रवाह भएको लगानीको गुणस्तरमा अर्थतन्त्रका विश्लेषकहरुले शङ्का गरेका छन् ।
आतङ्ककारी वा अन्य आपराधिक गतिविधिबाट आर्जित रकम लगानी भएको हुनसक्ने आशङ्का गर्दै नेपाल राष्ट्र बैङ्कका एकजना उच्च अधिकृत नाम उल्लेख नगर्ने सर्तमा प्रतिक्रिया दिँदै भन्छन् – “वेस्ट इन्डिजबाट भएको लगानी कति स्वस्थकर छ भन्ने कुराको निर्क्यौल गर्न जरुरी छ ।”
सेवा क्षेत्रमा मात्र उक्त देशबाट ६२ अर्ब ७७ करोड ९० लाख ७० हजार लगानी भएको नेपाल राष्ट्र बैङ्कले जनाएको छ । गत आर्थिक वर्षमा त्यति रकम नेपालमा लगानी भएको हो ।
‘नेपालमा प्रत्यक्ष वैदेशिक लगानी’ शीर्षकमा केन्द्रीय बैङ्कले पहिलोपटक गरेको सर्वेक्षणमा भारत दोस्रो र चीन तेस्रो लगानीकर्ता मुलुक बनेका देखाइएको छ । सोही अवधिमा भारतबाट औद्योगिक र सेवा क्षेत्रमा २७ अर्ब २५ करोड ४० लाख १० हजार र चीनबाट १० अर्ब ८४ करोड ४१ लाख रूपैयाँ लगानी भएको छ ।
नेपालमा सिङ्गापुर, आयरल्यान्ड, अस्ट्रेलिया, दक्षिण कोरिया, बंगलादेश, संयुक्त अधिराज्य, संयुक्त राज्य अमेरिका, नर्वे, पाकिस्तान, हङ्कङ, जापान, द नेदरल्यान्डस्, ताइवान, मलेसिया, बर्मुडा, स्विट्जरल्यान्ड, केम्यान आइल्यान्डस्, रसिया, श्रीलङ्का, संयुक्त अरब इमिरेट्स, फ्रान्स, मरिसस, थाइल्यान्ड, बु्रनाई, जर्मनी, टर्की, न्युजिल्यान्ड, स्विडेन, क्यानडा, बेलारुस, कजाकस्तान, ताजकिस्तान, साइप्रस, भुटान, सेसेल्स र इटालीबाट कृषि, औद्योगिक र सेवा क्षेत्रमा लगानी भएको सर्वेक्षण प्रतिवेदनमा उल्लेख छ ।
ती देशबाट दुई सय ५२ अाेटा कृषि, उद्योग र सेवासँग सम्बन्धित व्यापारिक प्रतिष्ठानमा लगानी भएको छ । रासस
