ब्लूमबर्गका अनुसार, हिजो असार मसान्तमा बेजोसको कुल सम्पत्ति १५० अर्ब डलर थियो, जुन विश्वका दोस्रा सबैभन्दा धनी व्यक्ति माइक्रोसफ्टका सहसंस्थापक बिल गेट्सको सम्पत्तिभन्दा करिब ५५ अर्ब डलर बढी थियो ।
अनलाइन रिटेल कम्पनी अमेजनका संस्थापक जेफ बेजोस आधुनिक इतिहासमा सबैभन्दा धनी व्यक्ति बनेका छन् । ब्लूमबर्गका अनुसार, हिजो असार मसान्तमा बेजोसको कुल सम्पत्ति १५० अर्ब डलर थियो, जुन विश्वका दोस्रा सबैभन्दा धनी व्यक्ति माइक्रोसफ्टका सहसंस्थापक बिल गेट्सको सम्पत्तिभन्दा करिब ५५ अर्ब डलर बढी थियो । ब्लूमबर्ग इन्डेक्समा बिल गेट्सको सम्पत्ति ९५.३ अर्ब डलर आकलन गरिएको छ ।
कीर्तिमानीस्तरमा अमेजनको सेयर
सोमबार एक पटक अमेजनको सेयर १,८४१.९५ डलरको कीर्तिमानीस्तरमा पुगेको थियो । हुन त पछि गएर अमेजनको सेयर ओरालो लागेपछि बेजोसको सम्पत्तिको १५० अर्ब डलरको आँकडा पनि तल आउन सक्छ । ब्लूमबर्ग इन्डेक्समा बेजोसपछि दोस्रो स्थानमा भएका बिल गेट्सद्वारा बिल एन्ड मेलिन्डा गेट्स फाउन्डेसनलाई दिइएको सम्पत्ति र उनको पहिलाको अरु सम्पत्तिलाई पनि जोड्ने हो भने उनी १५० अर्ब डलरको आँकडासम्म पुग्न सक्थे ।
पहिले पनि इतिहास रचेका छन् बेजोसले
यसभन्दा पहिला, यसै वर्ष ८ जनवरीमा पनि ब्लूमबर्गका तर्फबाट जारी लिस्टमा बेजोस १०५.१ अर्ब डलरको सम्पत्तिसहित विश्वका सबैभन्दा धनी व्यक्ति बनेका थिए । त्यतिखेर पनि उनले बिल गेट्सलाई नै उछिनेका थिए ।
