‘नेपाल डेभलपमेन्ट अपडेट’ कार्यक्रमलाई सम्बोधन गर्दै डा. खतिवडाले आर्थिक विकास गर्नकै लागि आयातमा निर्भर हाम्रो अर्थतन्त्रलाई सुधार्न आवश्यक रहेको बताए ।
अर्थमन्त्री डा. युवराज खतिवडाले देशको अर्थतन्त्र सुदृढ र बलियो बनाउन निजी क्षेत्रसँग सहकार्य गर्न तयार रहेको बताएका छन् । उनले निजी क्षेत्र उत्तरदायी भएर काममा लाग्ने हो भने सरकार सहकार्यका लागि तयार रहेको बताएका हुन् ।
‘नेपाल डेभलपमेन्ट अपडेट’ कार्यक्रमलाई सम्बोधन गर्दै डा. खतिवडाले आर्थिक विकास गर्नकै लागि आयातमा निर्भर हाम्रो अर्थतन्त्रलाई सुधार्न आवश्यक रहेको बताए । हाल नेपाल व्यापार घाटाको भुमरीमा फसेकाले आयातमुखी अर्थतन्त्रलाई परिवर्तन गरे मात्र आर्थिक विकास गर्न सकिने उनको भनाइ छ ।
अर्थतन्त्र सुधारका लागि संस्थागत अवरोध र संरक्षणवादको चुनौती रहेको बताउँदै उनले भने, ‘सरकारले चाहेअनुसार काम भएमा दोहोरो अङ्कको आर्थिक वृद्धि सम्भव छ ।’ रोजगारीको अवसर सृजना तथा आयात विस्थापन गर्न सके ७ प्रतिशत आर्थिक वृद्धि सम्भव रहेको खतिवडाको भनाइ छ ।
यस्तै नेपाल राष्ट्र बैङ्कले भने नेपाल लगानीमैत्री राष्ट्र बन्नका लागि कर तिर्ने पद्धतिमा सुधार गर्न आवश्यक रहेको जनाएको छ । कर तिर्ने प्रक्रियालाई २०७४ मा आएको श्रम ऐनले झनै अप्ठेरो र झन्झटिलो बनाएको विश्व बैङ्कले उल्लेख गरेको छ । नेपालमा प्रशस्त लगानीको सम्भावना हुँदा हुँदै वैदेशिक लगानी भित्रिन नसकेको विश्व बैङ्कले औंल्याएको छ ।
लगानीपछिको बजार, उत्पादन तथा सेवा उपलब्ध गराउने हो भने नेपालमा लगानीको प्रचुर सम्भावना रहेको जनाइएको छ ।
