निजी क्षेत्रबाट अध्ययन गरिएका संयुक्त लगानीका लागि उपयुक्त हुने परियोजना भएका सोको विवरण लगानी सम्मेलन २०१९ को सचिवालयमा उपलब्ध गराउन प्रस्ताव आह्वान गरेको बोर्डका प्रवक्ता उत्तमभक्त वाग्लेले बताए ।
काठमाडौं । सरकारले निजी क्षेत्रसँग लगानीयोग्य परियोजना माग गरेको छ । लगानी बोर्डको कार्यालयले लगानी सम्मेलनमा लगानीयोग्य परियोजना पेश गर्न निजी क्षेत्रसँग आयोजना माग गरेको हो ।
निजी क्षेत्रबाट अध्ययन गरिएका संयुक्त लगानीका लागि उपयुक्त हुने परियोजना भएका सोको विवरण लगानी सम्मेलन २०१९ को सचिवालयमा उपलब्ध गराउन प्रस्ताव आह्वान गरेको बोर्डका प्रवक्ता उत्तमभक्त वाग्लेले बताए । उनले आउँदो चैत १५ र १६ गते दुई दिन काठमाडौंमा हुने लगानी सम्मेलनमा पेश गर्नका लागि निजी क्षेत्रबाट प्रस्ताव आह्वान गरिएको बताए ।
विदेशी लगानीकर्ताको सम्मेलनमा सहभागिता हुने बताउँदै उनले संयुक्त लगानीका परियोजना माग गरिएको जानकारी दिए । विदेशी लगानी ल्याउन प्रवर्द्धन गर्न सरकारले सम्मेलनको आयोजना गरेको उनले स्पष्ट पारे । सम्मेलनमा ऊर्जा, भौतिक पूर्वाधार, औद्योगिक र सूचना प्रविधि क्षेत्रमा लगानी भित्र्याउने सरकारको योजना छ ।
२ वर्षअघि काठमाडौंमा भएको सम्मेलमा गरिएकामध्ये २५ प्रतिशत लगानी आउने अवस्थामा पुगेको छ । हालसम्म विभिन्न परियोजनामा २ खर्ब ७५ अर्ब रुपैयाँ बराबरको लगानी आउने क्रममा रहेको बोर्डले जानकारी गराएको छ ।
समझदारीमा हस्ताक्षर भएकामा अधिकांश जलविद्युत् आयोजना छन् । यस्तै विभिन्न २३ कम्पनीले विस्तृत सम्भाव्यता अध्ययनमा चासो देखाएका र उनीहरुले आयोजना प्रस्ताव पनि पेश गरिसकेका छन् । त्यसबेला १४ खर्ब ६० अर्ब रुपैयाँ बराबरको विदेशी लगानी प्रतिबद्धता प्राप्त भएको थियो ।
लगानीमैत्री वातावरणको अवस्था सिर्जना गर्न सरकारले विभिन्न आर्थिक ऐनलाई संशोधन गर्नका लागि सङ्घीय संसदको चालू अधिवेशनमा अधिकांश ऐन पेस गर्ने सरकारको लक्ष्य छ ।
आउँदो सम्मेलनमा प्रस्तुत गर्नका लागि विभिन्न क्षेत्रका ३० ओटा परियोजनाको अध्ययन भइरहेको छ । आयोजनाको सम्भाव्यता अध्ययनका लागि डेस्क स्टडिज र तथ्याङ्क सङ्कलनको काम भइरहेको बोर्डले जानकारी दिएको छ ।