उपाध्यक्ष डिक्सनले तीन तहका निर्वाचन सफलतापूर्वक सम्पन्न गरेकामा नेपाल सरकारलाई बधाई दिँदै अब राजनीतिक स्थायित्वतर्फ उन्मुख नेपालको सामाजिक–आर्थिक विकासका लक्ष्य प्राप्तिमा बल पुग्ने विश्वास व्यक्त गरिन् ।
अर्थमन्त्री ज्ञानेन्द्रबहादुर कार्कीसँग नेपाल भ्रमणमा रहेकी दक्षिण एसियाका लागि विश्व बैङ्ककी उपाध्यक्ष एन्नेट डिक्सनले अर्थ मन्त्रालयमा शिष्टाचार भेट गरेकी छन् ।
उक्त अवसरमा उनीहरूबीच नेपालको समसामयिक राजनीतिक अवस्था, आर्थिक गतिविधि, विकास प्रयास एवम् विश्व बैङ्कको ऋण सहायतामा सञ्चालित परियोजनाबारे विचारविमर्श भएको अर्थ मन्त्रालयले जानकारी दिएको छ । मन्त्री कार्कीले नेपालको चौतर्फी विकासका निम्ति बैङ्कबाट प्राप्त सहुलियतपूर्ण ऋणका लागि आभार प्रकट गर्दै गरिबी, बेरोजगारी, अशिक्षाजस्ता विकासका बाधा हटाउन नेपाल सरकारले गम्भीर भएर काम गरिरहेको बताए ।
उपाध्यक्ष डिक्सनले तीन तहका निर्वाचन सफलतापूर्वक सम्पन्न गरेकामा नेपाल सरकारलाई बधाई दिँदै अब राजनीतिक स्थायित्वतर्फ उन्मुख नेपालको सामाजिक–आर्थिक विकासका लक्ष्य प्राप्तिमा बल पुग्ने विश्वास व्यक्त गरिन् । भेटका अवसरमा अर्थ मन्त्रालयका उच्च अधिकारी नेपालस्थित विश्व बैङ्कका देशीय निर्देशक चिम्याओ फ्यानलगायत वरिष्ठ कर्मचारीको उपस्थिति थियो ।
