१० लाख रकम ऋण तिर्नका लागि उनले आफैंले अपहरणको नाटक रची परिवारबाट १५ लाख फिरौती मागेको प्रहरी अनुसन्धानबाट खुलेको कैलाली प्रहरी प्रमुख आभूषण तिमल्सेनाले बताए ।
काठमाडौं । गत बुधबार धनगढीबाट अपहरणमा परेका भनिएका व्यापारी जगतबहादुर सिंहले ऋण तिर्न नसकेर परिवारबाट रकम असुल्न अपरहणमा परेको नाटक रचेको प्रहरी अनुसन्धानबाट खुलेको छ ।
१० लाख रकम ऋण तिर्नका लागि उनले आफैंले अपहरणको नाटक रची परिवारबाट १५ लाख फिरौती मागेको प्रहरी अनुसन्धानबाट खुलेको कैलाली प्रहरी प्रमुख आभूषण तिमल्सेनाले बताए ।
सिंह गत बुधबार आफैं भारत गएर भारतीय नम्बरबाट घरमा फोन गरी आफू अपहरणमा परेको र अपहरणमुक्त हुन १५ लाख रुपैयाँ आवश्यक परेको भन्दै सो रकम माग गरेका थिए । उनले अपहरणकारीलाई दिने फिरौती रकम आफ्नो खातामा पठाउन भन्दै परिवारका सदस्यलाई खबर गरेका थिए । परिवारका सदस्यले पनि उनैले भनेझै रकम बैङ्क खातामा राखेको प्रहरी अनुसन्धानबाट खुलेको छ ।
सिंहको अपहरणबारे प्रहरीले अनुसन्धान गर्दा उनैले नाटक रचेको खुलेको हो । सिंहले फोन गरेको नम्बरको लोकेसन भारतको पञ्जाबमा देखिएपछि प्रहरी त्यहाँ पुगेको थियो । उक्त नम्बरको पिछा गर्दै जाँदा उनी आफैंले फोन गरेको खुलेको थियो । अपहरणको नाटक गर्ने सिंहलाई प्रहरीले आवश्यक कारबाही थालेको जनाइएको छ ।
