बीआर३२एस ४३५७ नम्बरको पल्सर मोटरसाइकलको ट्याङ्कीमुनि प्वाल बनाई प्वालमा ढोका जस्तो नट कसेको देखिएपछि शङ्का लागेर प्रहरीले सो नट खोलेर हेर्दा ट्याङ्कीभित्र सेतो रङको प्लास्टिकमा बेरेको सुन र चाँदी बरामद भएको प्रहरी उपरीक्षक शेखर खनालले जानकारी दिए ।
जनकपुरधाम । मोटरसाइकलको पेट्रोल ट्याङ्कीभित्र अवैध सुन र चाँदी लुकाई नेपालबाट भारततर्फ लगिरहेकाे अवस्थामा प्रहरीले दुई भारतीय नागरिकलाई पक्राउ गरेको छ ।
जनकपुरधाम उपमहानगरपालिका–१५ स्थित कुवा गाउँबाट लोहनातर्फ जाने सडकमा उनीहरूलाई पक्राउ गरिएको जिल्ला प्रहरी कार्यालय धनुषाले जनाएको छ ।
पक्राउ पर्नेमा भारत विहार मधुवनी जिल्ला बासोपट्टी–४ का ३७ वर्षीय कृष्णकुमार महतो सुडी र सोही ठाउँका ३० वर्षीय रूपेश महतो छन् । बीआर३२एस ४३५७ नम्बरको पल्सर मोटरसाइकलको ट्याङ्कीमुनि प्वाल बनाई प्वालमा ढोका जस्तो नट कसेको देखिएपछि शङ्का लागेर प्रहरीले सो नट खोलेर हेर्दा ट्याङ्कीभित्र सेतो रङको प्लास्टिकमा बेरेको सुन र चाँदी बरामद भएको प्रहरी उपरीक्षक शेखर खनालले जानकारी दिए ।
बरामद भएका सुनको बाला दुई थान र चाँदीको दाना नौ प्याकेट छन् । प्रहरी प्रधान कार्यालय तथा जिल्ला प्रहरी कार्यालयबाट खटिएको विशेष प्रहरी टोलीले आइतबार बेलुका ५ः४५ बजे लोहना हुँदै भारततर्फ जान लागेका अवस्थामा उनीहरूलाई पक्राउ गरिएको जनाइएको छ ।
प्रहरी उपरीक्षक खनालका अनुसार सुन चाँदी व्यवसायी सङ्घबाट बरामद भएका सुन र चाँदी परीक्षण गराउँदा सुनको टुक्रा १०० ग्राम र चाँदी २५ किलोग्राम तौल छ । पक्राउ गरिएकालाई हिरासतमा राखी आवश्यक कानुनी कारवाहीका लागि भन्सार कार्यालयमा बुझाउने कार्य भईरहेको जनाइएको छ । यस कारोबारमा अन्य को को संलग्न छन् भन्ने कुराको पनि अनुसन्धान भइरहेको प्रहरी उपरीक्षक खनालले बताएका छन् ।
