तत्कालीन आयुक्त पाठकलाई मोटो रकम खुस दिने न्यौपानेलाई पनि थुनामै राखेर कारबाही गर्ने अवस्था आएका कारण उनी त्यो कुराको सुइँको पाएर अगाडि नै भागेको अख्तियार स्रोतको भनाइ छ ।
काठमाडौं । अख्तियार दुरुपयोग अनुसन्धान आयोगको अनुसन्धानकै क्रममा रहेका इन्जिनियरिङ कलेजका सञ्चालक लम्बोदर न्यौपाने फरार भएका छन् । सो कलेजको मुद्दा मिलाउन भन्दै न्यौपानेले अख्तियार दुरुपपयोग अनुसन्धान आयोगका तत्कालीन आयुक्त राजनारायण पाठकलाई ७८ लाख घूस दिएको खुलासा भएपछि पाठकले राजीनामा दिएका थिए ।
त्यसपछि अख्तियारले अनुसन्धान थालेको हो । अनुसन्धानकै क्रममा न्यौपाने केही दिनयता अख्तियारको सम्पर्कबाहिर छन् । गत आइतबार उनलाई अख्तियारले बयानका लागि बोलाएको थियो । त्यो दिन बयान दिएर फेरि आवश्यक परेका बेला आउने सर्तमा अख्तियारबाट निस्केका न्यौपाने फरार भएका हुन् ।
तत्कालीन आयुक्त पाठकलाई मोटो रकम खुस दिने न्यौपानेलाई पनि थुनामै राखेर कारबाही गर्ने अवस्था आएका कारण उनी त्यो कुराको सुइँको पाएर अगाडि नै भागेको अख्तियार स्रोतको भनाइ छ ।
स्रोतले भन्यो, ‘आइतबार बोलाइएको न्यौपानेको स्वास्थ्य अवस्था ठीक नभएको देखिएपछि फेरि आउने भन्दै छाडियो, त्यही मोका पारेर उनी फरार भए । उनी फरार भएको खबरपछि अख्तियार टोलीले खोजी गरेपनि फेला भने पारेको छैन ।
फरार न्यौपाने खोज्न आयोगले टोली नै परिचालन गरेको स्रोतले जानकारी दियो । न्यौपाने स्थलमार्गबाट देश छाडेको अख्तियार अधिकारीको आशङ्का छ । न्यौपानेबारे अनुसन्धान जारी रहेको भन्दै यस विषयमा केही बोल्न नमिल्ने अख्तियारका प्रवक्ता रामेश्वर दङ्गालले बताए ।
क्यापिटल नेपालसँग कुरा गर्दै प्रवक्ता दङ्गालले भने, ‘अनुसन्धान जारी छ, अनुसन्धानमै भएका कारण यो कुरा गर्न मिलेन ।’
