काठमाडौः फागु पूर्णिमा (होली)मा अर्काको इच्छा विपरित जबर्जस्ती रङ दल्ने, प्लास्टिकको लोला हान्ने, फोहर छ्याप्ने र मादक पदार्थ सेवन गरी होहल्ला गर्ने ४६ जनालाई प्रहरीले नियन्त्रणमा लिएको छ।
महानगरीय प्रहरी परिसर काठमाडौंबाट खटिएको टोलीले बुधवार दिउँसो २ बजेसम्म ४६ जनालाई नियन्त्रणमा लिएको महानगरीय प्रहरी परिसर काठमाडौका डिएसपी होविन्द्र बोगटीले जानकारी दिए।
होलीलाई मर्यादित र सुरक्षित बनाउन उपत्यका १ सय ७ वटा प्रहरी टोली परिचालन भएको महानगरीय प्रहरी कार्यालय रानिपोखरीका एसएसपी श्याम ज्ञवालीले बताए। होलीको दिनमा आज काठमाडौँ उपत्यकाका विभिन्न स्थानमा विशेष कार्यक्रम आयोजना गरिएको छ। काठमाडौँको वसन्तपुर, मैतीदेवी, टुँडिखेल, सामाखुशी, टोखा, भृकुटीमण्डप, महाराजगञ्जलगायत १८ स्थानमा होली कार्यक्रम सञ्चालनका लागि जिल्ला प्रशासन कार्यालयबाट विभिन्न सङ्घ संस्थाले अनुमति लिएका छन् ।