काठमाडौंमा सुरु भएको विकास परिषदको बैठकमा अर्थमन्त्री खतिवडाले दोहोरो अंकको आर्थिक वृद्धिदर हासिल गर्ने आधारहरुका बारेमा छलफल जरुरी रहेको बताए ।
काठमाडौं । अर्थमन्त्री डा.युवराज खतिवडाले नेपालको आर्थिक वृद्धिदरको आधार प्रस्ट हुनुपर्ने बताएका छन् । काठमाडौंमा सुरु भएको विकास परिषदको बैठकमा अर्थमन्त्री खतिवडाले दोहोरो अंकको आर्थिक वृद्धिदर हासिल गर्ने आधारहरुका बारेमा छलफल जरुरी रहेको बताए । समृद्ध नेपालको परिकल्पना पूरा गर्नका लागि नागरिकको आधारभुत आवश्यकताका साथै विद्युत्, पानी भण्डारणको क्षमता बढाउने बारेमा गम्भीर छलफल हुनु पर्ने उनको जोड थियो ।
उनले आयात प्रतिस्थापन गरी स्रोतको लाभ लिन नसकेसम्म नेपालको ब्यापार घाटा कम नहुने भन्दै त्यसतर्फ ध्यान दिनुपर्ने बताए । बुधबारदेखि सुरु भएको विकास परिषदको बैठक दुई दिनसम्म चल्ने छ । बैठकमा चौधौं योजना दुई वर्षको समीक्षा र पन्ध्रौं योजनाको आधारपत्रको मस्यौदामाथि छलफल हुनेछ ।
बैठकमा पन्ध्रौं योजनाको आधारपत्रको मस्यौदाउपर विभिन्न सत्रमा सैद्धान्तिक छलफल हुनेछ । समष्टिगत आर्थिक, सामाजिक, पूर्वाधार, कृषि, वन तथा प्राकृतिक स्रोत क्षेत्र, लोकतन्त्र र शुसासन र अन्तरसम्वन्धित क्षेत्रका ६ ओटा फरक फरक सत्रमा छलफल हुनेछ ।
दोस्रो दिन, क्षेत्रगत छलफलबाट प्राप्त राय सुझाव प्रस्तुतीकरण गर्ने कार्यक्रम छ ।
