गत फागुन ८ गते बुधबारदेखि अवरुद्ध रहेको विद्युत् सेवा मङ्गलबारदेखि पुनः सञ्चालन गरिएको हो ।
गुल्मीको दरमखोला लघुजलविद्युत् परियोजनाको नहर मर्मत सम्भारपछि विद्युत् सेवा सञ्चालन भएको छ ।
मुसिकोट नगरपालिका–७ मा रहेको दरमखोला जलविद्युत् परियोजना लि.द्वारा सञ्चालित जलविद्युत् परियोजनाको विभिन्न स्थानमा दुई हप्तापछि नहर मर्मतसम्भार गरेपछि जलविद्युत् सेवा सञ्चालनमा ल्याइएको विद्युत् सञ्चालक समितिका अध्यक्ष धर्मेन्द्रकुमार मल्लले जानकारी दिए । गत फागुन ८ गते बुधबारदेखि अवरुद्ध रहेको विद्युत् सेवा मङ्गलबारदेखि पुनः सञ्चालन गरिएको हो ।
पचासी किलोवाट क्षमता भएको विद्युत् परियोजनाको विद्युत् सेवा सञ्चालन भएसँगै नगरपालिकाका २, ४, ७ र ८ गरी चारओटा वडाका झण्डै ९०० घरधुरीमा बिजुली बत्ती बलेको छ भने विद्युत् सेवा सञ्चालन भएपछि बिजुली बत्ती, उद्योगधन्दा, कलकारखाना, सञ्चारमाध्यम, कुटानी–पिसानीलगायत विद्युतीय यन्त्रसमेत सञ्चालनमा आएका छन् । दुई हप्तादेखि अन्धकारमा बसेका स्थानीय बासिन्दा र विद्यार्थी विद्युत् सेवा सञ्चालन भएपछि आफ्ना दैनिकीमा सहज हुने हँुदा निकै हर्षित भएका छन् । रासस
