त्रिभुवन अन्तर्राष्ट्रिय विमानस्थलको ट्राफिक चाप कम गर्ने विभिन्न विकल्पहरुबारे अध्ययन भइरहेको भन्दै केही दिनभित्रै ट्राफिक चाप कम गर्ने विकल्प सार्वजनिक गर्ने मन्त्री अधिकारीले बताए ।
पर्यटन, संस्कृति तथा नागरिक उड्ययन मन्त्री रवीन्द्र अधिकारीले तीन महिनामा जनतालाई अनुभूति हुने काम गर्ने बताएका छन् । ससाना परिवर्तनबाट नै जनतालाई विश्वास दिलाउने चाहना भएको मन्त्री अधिकारीले बताए ।
पर्यटन बाेर्डले अायाेजना गरेकाे पत्रकार भेटघाट तथा अन्तरक्रिया कार्यक्रममा सञ्चारकर्मीहरुसँग बोल्दै अधिकारीले आफू दीर्घकालीन योजनाअनुरुप अगाडि बढ्ने कुरा समेत उल्लेख गरे । उनले त्रिभुवन अन्तर्राष्ट्रिय विमानस्थलको ट्राफिक चाप कम गर्ने विभिन्न विकल्पहरुबारे अध्ययन भइरहेको भन्दै केही दिनभित्रै ट्राफिक चाप कम गर्ने विकल्प सार्वजनिक गर्ने बताए ।
भैरहवा र पोखरा अन्तर्राष्ट्रिय विमानस्थल सम्पन्न हुन समय लाग्ने भएकाले पनि विकल्प खोज्नु परेको उनले बताए । अन्तर्राष्ट्रिय विमानस्थलको चौतर्फी बिकास गर्ने र हाल भइरहेको लापरबाहीलाई पूर्ण रुपमा प्रतिस्थापन गर्दै अब आउने पर्यटकलाई सुविधायुक्त तरिकाले नेपाल भित्र्याइने उनको भनाइ थियो ।
‘आन्तरिक उडानलाई व्यवस्थापन गरेर विमानस्थल व्यवस्थित गर्ने चुनैती छ’, मन्त्री अधिकारीले भने । नेपालमा पर्यटकको सङ्ख्या मात्र वृद्धि गर्ने नभएर गुणस्तरीय पर्यटक ल्याउनेमा जोड दिँदै मन्त्री अधिकारीले आगामी ५ वर्षमा कुल गार्हस्थ्य उत्पादन (जीडीपी)मा २५ प्रतिशत योगदान पुर्याउने गरी काम गर्ने प्रतिबद्धता पनि व्यक्त गरे ।
आन्तरिक पर्यटनको विकास नभई बाह्य पर्यटक आकर्षित हुन नसक्ने उल्लेख गर्दै देशमा भएका पर्यटकीय क्षेत्रलाई व्यवस्थित बनाउन पहल गर्ने पनि सञ्चारकर्मीहरुसँग भएको भेटमा बताएका हुन् । पर्यटन विविधीकरण तथा पूर्वाधार विकासमा जोड दिँदै देशमा विद्यमान रहेको व्यापार घाटा घटाउन पर्यटनले महत्त्वपूर्ण भूमिका निर्वाह गरी पर्यटन विकासमा इमान्दारीपूर्वक लागिपर्ने बताए ।
मन्त्री अधिकारीले लामो समयसम्म सञ्चारकर्मीहरुको सुझाव लिँदै देशमा विद्यमान पर्यटन तथा पर्यटकीयस्थलका समस्या र समाधनका उपायबारे जानकारी दिएका थिए ।
