लुम्बिनी इँट्टा व्यवसायी सङ्घ भैरहवाका अनुसार चार दिनअघि आएको बर्सातले रुपन्देहीका ५२ ओटा इँट्टा उद्योगका दुई करोड ६० लाख गोटाभन्दा बढी पोल्न तयार काँचो इँट्टा गलेर नष्ट भएका हुन् ।
चैते वर्षाका कारण रुपन्देहीका इँट्टा उद्योगले ठूलो नोक्सानी बेहोरेका छन् । चैते वर्षाका कारण उद्योगमा तयार पारिएका दुई करोडभन्दा बढी काँचो इँट्टा नष्ट भएको छ ।
लुम्बिनी इँट्टा व्यवसायी सङ्घ भैरहवाका अनुसार चार दिनअघि आएको बर्सातले रुपन्देहीका ५२ ओटा इँट्टा उद्योगका दुई करोड ६० लाख गोटाभन्दा बढी पोल्न तयार काँचो इँट्टा गलेर नष्ट भएका हुन् । झरीका कारण गलेर इँट्टा नष्ट हुँदा व्यवसायीले १० करोड रुपैयाँभन्दा बढीको नोक्सानी बेहोरेका इँट्टा व्यवसायी सङ्घ लुम्बिनीका अध्यक्ष थानेश्वर घिमिरेले जानकारी दिए । अहिलेको झरीले एउटा भट्टामा कम्तीमा दुई लाखदेखि १० लाखसम्म काँचो इँट्टा गलेर नोक्सान भएको लुम्बिनी इँट्टा व्यवसायी सङ्घका लेखा समिति संयोजक गोविन्द ज्ञवालीले बताए ।
रुपन्देहीमा उत्पादन हुने इँट्टा रुपन्देहीबाहेक पाल्पा, गुल्मी, स्याङ्जा, पोखरा लगायतका स्थानमा पुग्ने गरेको छ । मङ्सिरदेखि वैशाखसम्म इँट्टा उत्पादन हुने समय भएको र त्यसपछिको ६ महिनासम्म वर्षा मौसममा यो उद्योग बन्द रहने गर्दछ । बेमौसमी वर्षाका कारण काँचो इँट्टा गलेर नष्ट भए पनि बजारमा इँट्टाको अभाव हुन नदिन आफूहरु लागिपरेको सङ्घका सचिव अजयकुमार गुप्ताले बताए । रासस
