यसअघि गत पुस १६ गतेबाट प्रशासक नियुक्ति प्रक्रिया अघि बढाइएकोमा चैत १६ गते छनोट समितिले संस्थानको प्रशासक नियुक्ति प्रक्रिया नै खारेज गरेर आवेदकले बुझाएको परीक्षा दस्तुर फिर्ता गरेको थियो ।
पूर्ण सरकारी स्वामित्वको राष्ट्रिय बिमा संस्थानको प्रशासक छनौट गर्न अर्थ मन्त्रालयले राष्ट्रिय बीमा संस्थानको प्रशासक छनौट तथा सिफारिससम्बन्धी कार्यविधि, २०७४ लागू गरेको छ । कार्यविधिअनुसार शैक्षिक योग्यतामा प्राप्त उपाधीअनुसार फरक फरक अङ्क दिइने उल्लेख छ ।
विद्यावारिधि (पीएचडी) गरेका आवेदकलाई थप २ नम्बर दिइनेछ भने स्नातकोत्तर प्रथम श्रेणीलाई १८, द्वितीय श्रेणीलाई १७ र तृतीय श्रेणीलाई १६ नम्बर दिइने छ । शैक्षिक योग्यता तथा तालिमलाई २५ अङ्क छुट्टयाइएकामा योग्यतालाई २० र तालिमका लागि ५ अङ्क निर्धारण गरिएको छ ।
त्यसैगरी कार्यानुभवलाई २५ अङ्क निर्धारण गरिएकोमा १५ वर्षभन्दा बढी समय काम गरेकालाई २५ अङक, १० देखि १५ वर्षलाई २३ र ५ देखि १० वर्षलाई २० अङ्क दिइने छ । कुल १५० अङ्कको परीक्षा हुने प्रशासकको परीक्षामा व्यावसायिक कार्ययोजना मूल्याङ्कनको आधार ४०, व्यावसायिक कार्ययोजना प्रस्तुतीकरण मूल्याङ्कनको आधार ४० र अन्तर्वार्ता मूल्याङ्कनको आधार २० अङ्क बनाइएको छ । यसका पनि प्रक्रियाअनुसार छुट्टाछुट्टै मूल्याङ्कन गर्ने आधार तयार गरिएको छ ।
बीमा, व्यवस्थापन, वित्त, लेखा, अर्थशास्त्र, वाणिज्यशास्त्र, कानुन, गणित, तथ्याङ्क शास्त्र वा इन्जिनियरिङमा कम्तीमा स्नातकोत्तर वा स्नातक उत्तीर्ण, चार्टर्ड एकाउन्टेन्सी प्राप्त गरी व्यवस्थापकीय तहमा ५ वर्ष काम गरेका व्यक्तिले प्रशासकमा आवेदन गर्न सक्ने व्यवस्था कार्यविधिले गरेको छ । आवेदकले आफ्नो व्यक्तिगत विवरणसहित ५ हजार शब्दमा नबढ्ने गरी व्यावसायिक कार्ययोजना पेस गर्नुपर्ने उल्लेख छ ।
गत पुस १६ गतेबाट प्रशासक नियुक्ति प्रक्रिया अघि बढाइएकोमा चैत १६ गते छनोट समितिले संस्थानको प्रशासक नियुक्ति प्रक्रिया नै खारेज गरेर आवेदकले बुझाएको परीक्षा दस्तुर फिर्ता गरेको थियो । यसअघि अर्थ मन्त्रालयका राजस्व सचिव शिशिरकुमार ढुङ्गानाको संयोजकत्वमा रहेको छनौट समितिले कर्मचारी सञ्चय कोष र बीमा संस्थानमा एकै पटक प्रशासक नियुक्ति प्रक्रिया अघि बढाएपनि पछि बीमा संस्थानको भने रद्द गरेको थियो ।
त्यतिबेला प्रशासकका लागि संस्थानका निमित्त प्रशासक सुरेन्द्र थापा, दामोदर सापकोटा, गणेशराज कार्की, राजेन्द्रजङ्ग कार्की, रामदेव यादव र शिवहरि श्रेष्ठले आवेदन दिएका थिए । बीमा संस्थानमा तत्कालीन प्रशासक अश्विनीकुमार ठाकुरको पदावधि सकिएसँगै रिक्त छ । बीमा संस्थान ऐन २०२५ अनुसार प्रशासकको पदावधि तीन वर्षको हुन्छ ।
