मङ्गलबार प्रधानमन्त्री ओलीलाई सम्बोधन गरी सार्वजनिक गरिएको विज्ञप्तिमा श्रम सम्झौता भएलगत्तै नेपाल सरकारको तर्फबाट रोजगारी खुलाउने उल्लेख गरिएको भए पनि हालसम्म नखुलेकाले आवश्यक निर्देशन जारी गर्न अनुरोध गरिएको छ ।

काठमाडौं : नेकपा निटक प्रगतिशील वैदेशिक रोजगार मञ्च नेपालले विगत ६ महिनादेखि बन्द भएको मलेसियाको रोजगार खुलाउन प्रधानमन्त्री केपी शर्मा ओलीलाई आग्रह गरेको छ । मङ्गलबार प्रधानमन्त्री ओलीलाई सम्बोधन गरी सार्वजनिक गरिएको विज्ञप्तिमा श्रम सम्झौता भएलगत्तै नेपाल सरकारको तर्फबाट रोजगारी खुलाउने उल्लेख गरिएको भए पनि हालसम्म नखुलेकाले आवश्यक निर्देशन जारी गर्न अनुरोध गरिएको छ ।

मलेसियाको रोजगार खुलाउन श्रम, रोजगार तथा सामाजिक सुरक्षा मन्त्रालयमा पहल गर्दा ठोस निकास नभएका कारण आम व्यवसायी र रोजगारमा जान तयार रहेका नेपाली श्रमिकसमेतमा आशङ्का बढेका कारण समस्या समाधानका लागि प्रधानमन्त्री ओलीलाई आग्रह गरेको विज्ञप्तिमा उल्लेख छ ।

प्रगतिशील रोजगार मञ्चले प्रधानमन्त्री ओलीलाई बुझाएको पत्रमा गत जेठ २ गते मलेसियाको रोजगार बन्द भएपछि उक्त समयभन्दा अघि भिषा प्रोसेसिङमा आएका ९ हजार २ सय १७ जना नेपाली श्रमिक हालसम्म जान नपाएको, भिषा प्रक्रियाका लागि तत्कालीन राज्यले व्यवस्था गरेका विविध शीर्षकमा खर्च गरेको करोडौं रुपैयाँ खेर जान लागेको उल्लेख छ ।

यस्तै विगतको तथ्याङ्क हेर्दा प्रत्येक वर्ष मलेसिया मात्र जाने नेपाली श्रमिकहरुको सङ्ख्या १ लाखको हाराहारीमा रहेको र आव २०७४÷७५ मा समेत कुल १ लाख २ हजार ९ सय ७९ जना नेपाली कामदार मलेसिया गएको श्रम विभागको तथ्याङ्कले देखाएको छ ।

यस अनुपातमा यस वर्ष ६ महिना मलेसिया बन्द हुँदा ५० हजारभन्दा बढी नेपाली श्रमिकहरुको रोजगार गुम्न गएको र अझ ढिलाइ भएमा यो सङ्ख्या बढ्दै जाने र यसले नेपालको विप्रेषणका साथै समग्र अर्थतन्त्रमा समेत असर पर्ने भएकाले श्रम सम्झौता कार्यान्वयन गराउन सहयोग गरिदिनुहुन भनी मलेसिया राजदूतावासले नेपाल सरकार परराष्ट्र मन्त्रालयलाई पत्रसमेत पठाएको र श्रम सम्झौता कार्यान्वयनमा अझै ढिलाइ हुँदै जाने हो भने मलेसिया सरकारले नेपाललाई स्रोत मुलकबाट हटाउन सक्ने खतरा बढ्दै गएको प्रति प्रधानमन्त्री ओलीको ध्यानाकर्षण गराएका छन् ।