रुपन्देही प्रहरी प्रमुख हृदय थापाका अनुसार दोहोरो फायरमा प्रहरीको गोली लागेर घाइते भएका एक तस्करको भैरहवा मेडिकल कलेजमा उपचारका क्रममा राति मृत्यु भएको हो ।
काठमाडौं : रुपन्देहीको सिद्धार्थनगर नगरपालिका–१०, शङ्करपुरमा तस्कर र प्रहरीबीच भिडन्त भएको छ । प्रहरी र तस्करबीचको गोली हानाहानमा प्रहरीको गोली लागेर एक जनाको मृत्यु भएको छ ।
गए राति साढे १२ बजे तस्करलाई नियन्त्रण लिन खोज्दा प्रहरी टोलीमाथी गोली प्रहार गरेपछि प्रहरीले जवाफी कारबाही गरेको थियो ।
रुपन्देही प्रहरी प्रमुख हृदय थापाका अनुसार दोहोरो फायरमा प्रहरीको गोली लागेर घाइते भएका एक तस्करको भैरहवा मेडिकल कलेजमा उपचारका क्रममा राति मृत्यु भएको हो ।
भारतीय नम्बरप्लेट यूपी ५३ एच २०२८ मोटरसाईकलमा आएका तस्करहरुलाई सादा पोशाकका प्रहरीले रोक्न खोज्दा उनीहरुले प्रहरीमाथि नै गोली चलाएको प्रहरीले जनाएको छ । गस्तीमा खटिएका प्रहरी जवान कृष्ण श्रेष्ठको बायाँ हातमा गोली लागेको छ ।
मृतक तस्करको भने अहिलेसम्म पहिचान नखुलेको रुपन्देही प्रहरी प्रमुख प्रहरी उपरीक्षक हृदय थापाले जानकारी दिए । उनका अनुसार प्रहरीले घटनास्थलबाट भारतीय नम्बर प्लेटको एउटा मोटरसाइकल र एक थान पेस्तोल बरामद गरेको छ ।
