चितवनको रामपुरमा आयोजित राष्ट्रिय मकैबाली अनुसन्धान कार्यक्रममा मन्त्री खनालले नेपालका वैज्ञानिक पलायन हुने अवस्थाको अन्त्य गर्न अनुसन्धान केन्द्रमै अनुसन्धान गर्न आवश्यक रहेको बताए ।
काठमाडाैं । कृषिमन्त्री चक्रपाणि खनालले नेपाल कृषि अनुसन्धान परिषद् ((नार्क)भित्रै समस्या रहेको भन्दै त्यस्को अनुसन्धान गर्नुपर्ने आवश्यकता रहेका बताएका छन् ।
चितवनको रामपुरमा आयोजित राष्ट्रिय मकैबाली अनुसन्धान कार्यक्रममा मन्त्री खनालले नेपालका वैज्ञानिक पलायन हुने अवस्थाको अन्त्य गर्न अनुसन्धान केन्द्रमै अनुसन्धान गर्न आवश्यक रहेको बताए । ‘नेपालका वैज्ञानिकको अनुसन्धान विगतमा सार्क मुलुकमा अग्रणी स्थानमा थियो । वैज्ञानिकको हिजोको विरासत कहाँनिर टुट्यो ?’ उनले प्रश्न गरे ।
मन्त्री खनालले नार्कलाई कुनै आरोप लगाउने पक्षमा आफू नरहेको भन्दै कृषि क्षेत्रमा प्रगति गर्न नसक्नुको गल्ती कमजोरी खोजी गर्नुपर्ने बताए । आधुनिक कृषिका माध्यमबाट मात्रै मुलुकको विकास र समृद्धि हुने भन्दै त्यस्का लागि अनुसन्धान र किसानलाई प्रविधिमा जोड दिनुपर्ने उनको तर्क थियो ।
कार्यक्रममा नार्कका परिषद् सदस्य मित्रराज दवाडी, किशोर दाहाल, भरतपुर महानगरका प्रमुख रेनु दाहालको सहभागिता थियो । उनीहरुले कृषिलाई बैज्ञानिकरण गर्दै आधुनिकीकरण र यान्त्रीकरणमा जोड दिनुपर्ने आवश्यकता रहेको औल्याए ।
