बेइजिङ,चीन । चिनियाँ अधिकारीले चीनका निजी कम्पनी तथा फर्मलाई दिइँदै आएको बैङ्किङ कर्जा वृद्धि गर्न माग गरेका छन् । साना तथा लघु उद्योगलाई लक्षित गरी बैङ्कले कर्जा रकममा वृद्धि गर्न अधिकारीले सुझाव दिएका हुन् ।

चिनियाँ बैङ्किङ तथा बिमा नियमनकारी आयोग (सीबीआइआरसी) ले सार्वजनिक गरेको नीतिअनुसार राज्य सञ्चालित ठूला ऋणदाताले साना तथा लघु कम्पनीहरू जसले १५ लाख अमेरिकी डलरबराबर वा सोभन्दा कम ऋणको माग गरिरहेका छन्, लाई यस वर्षबाट ३० प्रतिशत प्रतिशत कर्जा वृद्धि गरिने बताइएको छ ।

आयोगका उपाध्यक्ष वाङ झाओसिङले सोमबार एक पत्रकार सम्मेलनमा भने, “राज्य सञ्चालित बैङ्कले गत वर्ष ती कम्पनीलाई दिइने कर्जामा २१ प्रतिशतले वृद्धि गरेको थियो भने बैङ्कहरूले उनीहरूलाई दिने कर्जालाई यस पहिलेदेखि नै बढाउन थालिसकेका छन् ।”

सीबीआईआरसीको नयाँ नियमले हरेका वाणिज्य बैङ्कद्वारा उनीहरूको वार्षिक लक्ष्यमा मार्चको अन्त्यसम्ममा निजी फर्मलाई कर्जा दिने व्यवस्था गर्न निर्देशन गरेको छ । कर्जा उपलब्ध गराइएको वा नगराइएकोबारे त्रैमासिकरूपमा अनुगमन गरिने सीबीआईआरसीले जनाएको छ ।

आयोगको नयाँ नियमअनुसार कर्जा प्रवाह गरिएको वा नगरिएको कडा रूपले अनुगमन गरिने बताइएको छ । कर्जा परीक्षण र अनुमोदन प्रक्रियामा बैङ्कले अविवेकी खालको शर्त खडा गर्न नपाउने राज्य सञ्चालित बैङ्किङ संस्थाले जस्तै समान दर र नियम लागू गर्नुपर्नेछ ।

चीनले लगानीको अभावमा रहेका साना तथा मझौला कम्पनीलाई प्रोत्साहन गरी उनीहरूको आर्थिक कठिनाइका साथै राष्ट्रिय उत्पादनलाई वृद्धि गरी देशको समग्र आर्थिक वृद्धिदरलाई बढाउने लक्ष्य लिएको हो । रासस/सिन्ह्वा