श्रम सम्झौतालगायत कतार भिसा सेन्टरका विषयमा छलफल गर्न कतारले पटक पटक नेपाललाई बोलाए पनि नेपालले तीन पटक समय दिएर पनि नगएको परराष्ट्र मन्त्रालय स्रोतले बतायो ।
काठमाडौं : कतारले नेपालमा राख्न लागेको कतार भिसा सेन्टरका विषयमा नेपालले कतारमा प्राविधिक टोली गएर छलफल गर्ने जनाएको छ । नेपाल र कतारबीचको हुन लागेको नयाँ श्रम सम्झौतामा कतारले नेपालमा राख्न लागेको भिसा सेन्टरका विषयमा पनि टुुंगो लाग्ने श्रम, रोजगार तथा सामाजिक सुरक्षा मन्त्रालयले जनाएको छ । कतारसँग नेपालले पहिलो पटक २००५ मार्च २१ माश्रम सम्झौता गरेको थियो ।
नयाँ श्रम सम्झौताका लागि नेपालले कतारलाई मस्यौदा पठाइसकेको छ । कामदारको हकअधिकार, सुविधा, तलब, बिदादेखि लिएर कामदार लिने प्रक्रियाका विषयमा श्रम सम्झौतामा बुँदाहरु राखिएको मन्त्रालयले जनाएको छ । सम्झौतामा कतारले नेपालमा राख्न खोजेको भिसा सेन्टरका विषयमा पनि अन्तिम छलफल हुने मन्त्रालयले जनाएको छ । छलफलका लागि आगामी साता नेपालबाट प्राविधिक टोली कतार जाने तयारीमा छन् ।
कतारले २०१८ डिसेम्बरमै नेपालमा कतार भिसा सेन्टर राख्न परराष्ट्र मन्त्रालय र श्रम मन्त्रालयलाई जानकारी गराएको थियो । तर मलेसिया जाने कामदारलाई विभिन्न संस्थाले ठगी गरेको भन्दै श्रम मन्त्रालयले कारबाही गरिरहेका बेला कतारमा पनि त्यस्तै संयन्त्र हुने आशंका गर्दै श्रम मन्त्रालयले स्वीकृति नदिएपछि कतार पछि हटेको थियो । श्रममन्त्री गोकर्ण विष्टले कामदार ठगिन सक्ने भन्दै तत्काल भिसा सेन्टर स्थापना गर्न स्वीकृति दिएका थिएनन् ।
श्रम सम्झौतालगायत कतार भिसा सेन्टरका विषयमा छलफल गर्न कतारले पटक पटक नेपाललाई बोलाए पनि नेपालले तीन पटक समय दिएर पनि नगएको परराष्ट्र मन्त्रालय स्रोतले बतायो ।
कतारको श्रम मन्त्रालय, गृह मन्त्रालय र स्वास्थ्य मन्त्रालयसको सहित समय मागेर बैठक भए पनि नेपालबाट जान ढिला भएकाले श्रम सम्झौता र कतार भिसा सेन्टरका विषयमा ढिला भएको परराष्ट्रका एक उपसचिवले बताए । श्रम मन्त्रालयले श्रम सम्झौताका विषयमा आफू मातहत निर्णय हुने भएकाले तयारी गर्नुपर्ने भन्दै ढिला गरेको उनले बताए ।
नेपालस्थित कतारका राजदूत युुसुफ विन मोहम्मद केही दिनअघि कतार पुगेर नेपालको विषयमा कतार सरकारलाई जानकारी गराइसकेका छन् । एक साता बढी कतार बसेर मार्च ३ मा नेपाल आएका युसुफले श्रम सम्झौता र कतार भिसा सेन्टर स्थापनाको तयारीको विषयमा जानकारी गराएको दूतावास स्रोतले बतायो ।
श्रम मन्त्रालयका सचिव महेश्वर दाहालले नेपाली प्राविधिक टोली आगामी साता कतार जाने बताए । ‘कतारसँग गर्न लागिएको नयाँ श्रम सम्झौतामा कतार भिसा सेन्टरको विषयमा पनि छलफल हुन्छ,’ उनले भने । कतारसँग नयाँ श्रम सम्झौताका विषयमा तयारी अन्तिम भइरहेको छ, त्यही बेला सबै विषय टुङ्गो लाग्ने उनले बताए ।
कतारले श्रीलङ्का, पाकिस्तान र बङ्गलादेशमा कतार भिसा सेन्टर स्थापना गरेर काम थालिसकेको छ । मार्चका अन्तिमदेखि भारतमा पनि भिसा सेन्टर सञ्चालन हुने कतार सरकारले जनाएको छ । त्यस्तै फिलिपिन्स र इन्डोनेसियामा अप्रिलमा सञ्चालन हुने पनि कतार सरकारले जानकारी गराइसकेको छ ।
