ललितपुरको नख्खुस्थित एनसेल मुल्यालय, वैदेशिक रोजगार व्यवसायी सङ्घका अध्यक्ष रोहन गुरुङको घरमा बम विस्फोटलगायत घटनामा समातिएका विप्लवका कार्यकर्ताले एउटै बोली बोलिरहेका छन्— बरु गोली हान्नुस्, मुख खोल्दैनौं ।
काठमाडौं । नेत्रविक्रम चन्द विप्लवले पक्राउ परेको अवस्थामा आफ्नो समूहका नेता–कार्यकर्तालाई प्रहरीसँग के भन्ने र कस्तो व्यवहार देखाउने भन्नेबारे तालिम दिएको प्रहरी अनुसन्धानबाट खुलेको छ ।
ललितपुरको नख्खुस्थित एनसेल मुल्यालय, वैदेशिक रोजगार व्यवसायी सङ्घका अध्यक्ष रोहन गुरुङको घरमा बम विस्फोटलगायत घटनामा समातिएका विप्लवका कार्यकर्ताले एउटै बोली बोलिरहेका छन्— बरु गोली हान्नुस्, मुख खोल्दैनौं ।
रोहन गुरुङको घरमा बम हान्ने र एससेल कार्यालयमा बम राखेको आशङ्कामा पक्राउ परेकाहरुले प्रहरीमा बयानै फरक दिएको खुलेको छ । एनसेल बमकाण्डमा पक्राउ परेका विप्लवका पूर्वबडिगार्ड त्यो दिन सोही क्षेत्रमा सक्रिय रहेको टेलिफोन लोकेसनबाट देखिए पनि उनले प्रहरीलाई घटना हुने दिन आफू भक्तपुरमा रहेको भन्दै झुट बोलेको स्रोतले जानकारी दियो ।
त्यसैगरी रोहन गुरुङको घरमा बम राखेको आशङ्कामा पक्राउ परेकाहरुले पनि त्यसैगरी प्रहरीलाई झुट बोलेको पाइएको छ । ‘हामीले त्यसै पक्राउ गरेका होइनौं,’ घटनाको अनुसन्धानमा संलग्न अधिकारीले भने, ‘घटनामा उनीहरुको संलग्नता रहेको प्रमाण छ । तर पनि उनीहरु त्यो कुरा होइन भन्छन् । लोकेसन एकातिर हुन्छ, आफूहरु एकातिर रहेको दाबी गर्छन्, धेरै बोल्दैनन् ।’
प्रहरीले नख्खु घटनायता उपत्यकालगायत देशभरबाट ७० जना विप्लवका नेता–कार्यकर्तालाई समातिसकेको छ । उनीहरुबारे अनुसन्धान भइरहेको प्रहरी प्रवक्ता एसएसपी उत्तम सुवेदीले जानकारी दिए ।
