बेइजिङ, चीन । चिनियाँ केन्द्रीय भन्सार कार्यालयले आफ्नो देशका लागि विदेशबाट आयात गर्ने उद्योग तथा व्यावसायिक संस्थानले मूल्य अभिवृद्धि कर (भ्याट) दरमा सन् २०१९ का लागि उल्लेखनीय कटौती गर्ने बताएको छ ।

चीनले व्यावसायिक संस्थानबाट मूल्य अभिवृद्धि करवापत लिँदै आएको करमा केही छुट दिएर कमजोर उद्योगलाई धाराशायी बन्न नदिने प्रयासस्वरूप उक्त योजना ल्याउन लागेको भन्सार कार्यालयले जनाएको छ ।

चिनियाँ सामान्य भन्सार प्रशासनले बुधबार कर छुटबारे जानकारी गराउँदै भन्यो, “सरकारले आगामी अप्रिल १ देखि लागू हुनेगरी उक्त कर छुट योजना ल्याएको र सामान आयातमा दिइने छुटबाट सरकारले यस वर्ष ३३ अर्ब ५० करोड अमेरिकी डलरबराबरको दायित्व बहन गर्नुपर्नेछ ।”

भन्सार कार्यालयले भनेको छ, “करदाताहरूले विदेशबाट ल्याउने सामानमा तिर्दै आएको १६ प्रतिशत करमध्ये तीन प्रतिशत कर छुट पाउनेछन् भने १० प्रतिशत भ्याट बुझाउँदै आएका कम्पनी तथा फर्मले नौ प्रतिशत मात्र कर बुझाए पुग्नेछ ।”

सन् २०१८ को मे १ पहिले १७ प्रतिशत र ११ प्रतिशत कर उठाउँदै आएकोमा मे १ पछि सरकारले यसबाट एक प्रतिशत कम अर्थात क्रमश १६ र १० प्रतिशत मूल्य अभिवृद्धि कर उठाउँदै आएको थियो ।

पछिल्लो निर्णयअनुसार सीमापारबाट ई–कमर्समार्फत आयातित वस्तुको खुद्रा सामानको मूल्यमा पनि कर छुट हुनेछ जसबाट स्वदेशमा निर्माण गरिएका वस्तुको मूल्य सुलभ भई स्वदेशी कम्पनी तथा फर्मलाई एक खर्ब ३५ अर्ब युआनबराबरको लाभ हुने बताइएको छ ।

चीनको सरकारी कार्यक्रम प्रतिवेदनअनुसार ठूलो दरका कर तथा शुल्कमा यस वर्ष कटौती गर्ने र करदातालाई करको भारमा कटौती गर्ने र घरेलु कम्पनी तथा फर्मको विमाबाट प्राप्त हुने झन्डै दुई ट्रिलियन युआनबराबरको सामाजिक बिमाको योगदानबाट मिलान गर्ने आश्वासन दिएको थियो । रासस/सिन्ह्वा