नेपाल वैदेशिक रोजगार व्यवसायी सघंको आन्दोलनका कारण विदेश जाने यात्रु नभएकै कारण एयर अरेबियाको जी एन ५३२ को कलसाइन भएको विमानको उडान रद्द भएकाे हाे ।
काठमाडौं । विदेश जाने यात्रु नपाएपछि एयर अरेबियाले सोमबारको उडान रद्द गरेको छ । नेपाल वैदेशिक रोजगार व्यवसायी सघंको आन्दोलनका कारण विदेश जाने यात्रु नभएकै कारण एयर अरेबियाको जी एन ५३२ को कलसाइन भएको विमानको उडान रद्द भएको हो । एयर अरेबियाले दैनिक तीन उडान गर्दै आएकाे थियो । यात्रु नभएकै कारण उडान रद्ध गरिएको एयरलाइन्स भनाइ छ ।
संघले १ वर्षदेखि बन्द रहेको मलेसियाको रोजगारी खुलाउनुपर्ने, धरौटी बापत राख्ने रकमको ब्याज दिनु पर्ने, कामदार पठाउँदा म्यानपावर कम्पनीले पाउने सेवा सुविधा अन्य देशकै जति पाउनु पर्नेलगायतका मागहरु राख्दै गत १७ गतेबाट ७ दिनको लागि विदेशमा कुनै पनि कामदार नपठाउने निर्णय गरेको थियो ।
संघको आन्दोलनको कारण यतिबेला त्रिभुवन अन्तर्राष्ट्रिय विमानस्थल खाली भएको छ । विशेषागरी वैदेशिक रोजगार क्षेत्रमा जाने कामदारको कारण खचाखच हुने विमानस्थल कामदार नभएकै कारण खाली भएको हो ।
संघका अध्यक्ष रोहन गुरुङले व्यवसायीहरुले ३ दिनदेखि कामदार पठाउन रोक्दासमेत सरकार गम्भीर नभएको आरोप लगाएका छन् । उनले कामदार पठाउँन रोक्ने काम रहर नभई बाध्यता भएको बताउँदै सरकारले आफूहरुको माग पूरा गर्न गम्भीर नभएमा अझ शसंक्त आन्दोलन गर्ने तयारी गरेको बताए ।
‘सरकारले नै वैदेशिक रोजगार काम छैन भनेर लेखेर दियोस्, तत्काल बन्द गर्न हामी तयार छौँ, सघंका अध्यक्ष गुरुङले भने, नत्र हाम्रो मागलाई पनि सम्बोधन गर्न तयार हुनुपर्यो नि’ ।
