चौतारी लघुवित्त वित्तीय संस्थाले पाँच लाख ४० हजार कित्ता साधारण सेयर(आर्इपीओ) बिक्री गर्ने भएको छ ।

एक सय मूल्य अङ्कित दरका पाँच करोड ४० लाख रूपैयाँबराबरको साधारण सेयर बिक्रीका लागि एनआर्इबीएलएस क्यापिटल लिमिटेडलाई धितोपत्र निष्काशन तथा बिक्री प्रबन्धकमा नियुक्त गरिएको सो संस्थाले आज प्रकाशित गरेको विज्ञप्तिमा उल्लेख छ ।

संस्थाको अधिकृत पूँजी ३० करोड, जारी पूँजी १८ करोड र चुक्तापूँजी १२ करोड ६० लाख रूपैयाँ छ ।

सेयर निष्काशनसम्बन्धी सम्झौतापत्रमा चौतारी लघुवित्त वित्तीय संस्थाका प्रमुख कार्यकारी अधिकृत लक्ष्मण घिमिरे र एनआर्इबसीएल एस क्यापिटलको तर्फबाट महाप्रबन्धक मेखबहादुर थापाले हस्ताक्षर गरेका छन् ।

बुटवलमा केन्द्रीय कार्यालय रहेको यो वित्तीय संस्थाले छोटो अवधिमै रुपन्देही, नवलपरासी, कपिलवस्तुु, गुुल्मी, अर्घाखाँची, पाल्पा, दाङ ,प्यूठान, रोल्पा र सल्यान गरी १० जिल्लाभित्र ३४ अाेटा शाखा कार्यालय स्थापना गरेको छ । ती कार्यालयबाट २२ हजार ९ सय ८ विपन्न महिलालाई समूहमा आबद्ध गरी १७ करोड ६४ लाख ५२ हजार रूपैयाँ बचत सङ्कलन गरेको छ ।

यस्तै ६१ करोड ५० लाख ७८ हजार कर्जा प्रवाह गरेको सो संस्थाले गत आर्थिक वर्षमा ५७ लाख खुद मुनाफा आर्जन गरेको थियो । संस्थाले चालू आवको तेस्रो त्रैमासिकसम्ममा ६५ लाख ४२ हजार रूपैयाँ खुद मुुनाफा हासिल गर्न सफल भएको विज्ञप्तिमा उल्लेख छ ।