टिम्स कार्ड (पदयात्री सूचना व्यवस्थापन प्रणाली) निषेध गरेर पर्यटन प्रवेश शुल्क सङ्कलन गर्नथालेको खुम्बु पासाङ ल्हामु गाउँपालिकाले सात महिनाको अवधिमा आठ करोड रूपैयाँभन्दा बढी राजश्व सङ्कलन गरेको छ ।

गतवर्ष २०१७ को अक्टोबरदेखि २०१८ को अप्रिल महिनाको अन्तिमसम्म आठ करोड २३ लाख ४१ हजार पर्यटन प्रवेश शुल्क सङ्कलन गरेको गाउँपालिकाका प्रवक्ता लाक्पा छिरि शेर्पाले जानकारी दिए ।

यो अवधिमा ४१ हजार १ सय ७० जना पर्यटकले खुम्बु क्षेत्रको भ्रमण गरेका छन् । यसरी हेर्दा गाउँपालिकाको मासिक आम्दानी एक करोडभन्दा बढी देखिन्छ । नेपाल पर्यटन बोर्डले टिम्स कार्ड (पदयात्री व्यवस्थापन प्रणाली) वितरण गरिरहेको भएपनि त्यसलाई पूर्णनिषेध गर्दै गाउँपालिकाले पर्यटन प्रवेश शुल्क सङ्कलन गर्न थालेको हो । गाउँपालिकाले स्टेशन नै खडा गरेर खुम्बु प्रवेश गर्ने प्रतिपर्यटक दुई हजार प्रवेश शुल्क सङ्कलन गर्ने गरेको छ ।

गाउँपालिकाको तथ्याँकअनुसार अक्टोबर महिनामा सात हजार १२ जनाबाट एक करोड ४० लाख ३५ हजार, नोभेम्बर महिनामा सात हजार ४ सय १२ जनाबाट एक करोड ४० लाख ३५ हजार रूपैयाँ राजश्व सङ्कलन भएको गाउँपालिकाका प्रवक्ता लाक्पाछिरि शेर्पाले जानकारी दिए ।

यस्तै, डिसेम्बर महिनामा दुई हजार ४ सय १७ पर्यटकबाट ४८ लाख ३४ हजार, जनवरीमा एक हजार पाँच पर्यटकबाट २० लाख १० हजार, फेब्रुअरीमा एक हजार ५ सय ६२ पर्यटकबाट ३१ लाख २४ हजार, मार्च महिनामा छ हजार ७ सय ४७ पर्यटकबाट एक करोड ३४ लाख ९४ हजार र अप्रिलमा १० हजार २ सय ६४ पर्यटकबाट दुई करोड ५२ लाख आठ हजार राजश्व जम्मा भएको गाउँपालिकाले जनाएको छ ।

पर्यटन बोर्डले टिम्स कार्ड वितरण गरेर करोडौँ राजश्व सङ्कलन गरेपनि खुम्बु क्षेत्रको पर्यटन प्रवर्द्धनमा चासो नदिएको भन्दै गाउँपालिकाले टिम्स कार्ड नै निषेध गरेको गाउँपालिका अध्यक्ष ङिमदोर्जी शेर्पाले बताए । पर्यटन बोर्डले भने गाउँपालिकाले टिम्स कार्ड निषेध गरेर प्रवेश शुल्क लिनु गैरकानुनी रहेको जनाउँदै आएको छ । रासस