बढी मात्रामा भारतीय पर्यटक आउने सो क्षेत्रमा गत वर्षभन्दा यस पटक यात्रु कम आउँदा उडानको चाप कम भएपनि चहलपहल भने उस्तै रहेको हेलिकप्टर कम्पनीहरुले जनाएका छन् ।
तिब्बतको मानसरोवर पुग्न अघिल्लो वर्षभन्दा कम यात्रु भएपनि यस वर्ष आठ हेलिकप्टर कम्पनीका १० ओटा हेलिकप्टर एक महिनाका लागि हुम्लाको सिमीकोटमा नै आधार क्षेत्र बनाउने भएका छन् ।
बढी मात्रामा भारतीय पर्यटक आउने सो क्षेत्रमा गत वर्षभन्दा यस पटक यात्रु कम आउँदा उडानको चाप कम भएपनि चहलपहल भने उस्तै रहेको हेलिकप्टर कम्पनीहरुले जनाएका छन् ।
कैलाश दर्शन गरे स्वर्ग गइन्छ भन्ने जनविश्वासका साथ मानसरोवरमा हिन्दू धार्मिक पर्यटकहरु बढी आउने गर्छन् । हिन्दू र बौद्ध धर्मावलम्बीहरुको पवित्रस्थलका रुपमा रहेको मानसरोवर, पर्यटकीय गन्तव्य पनि रहेकाले अन्य मुलुकबाट पनि पुग्ने क्रम बढ्दो छ ।
‘अहिलेसम्म अघिल्लो वर्षभन्दा कम बुकिङ भएको छ,’ माउन्टेन हेलिकप्टर प्रालिका महाप्रबन्धक दिल ओलीले भने । तर, सिमीकोटदेखि नेपाल चीन सिमाना हिल्सासम्म यात्रुहरु हेलिकप्टरमार्फत नै जाने भएकाले ८ हेलिकप्टर कम्पनीले सेवा दिइरहेको उनले बताए ।
मानसरोवर जाने मुख्य सिजन जेठ र असार हो । सो क्षेत्रमा जान अहिले दिनहुँ हेलिकप्टर चार्टर हुने गरेका छन् । छिटो पुग्न लाखौं रुपैयाँ खर्च गरेर हेलिकप्टरमार्फत जाने तीर्थ यात्रीको सङ्ख्यामा वृद्धि भएको छ ।
सिमीकोटबाट नेपाल र चीनको हिल्सा नाकासम्म हेलिकोप्टरमा जान सकिन्छ । मानसरोवर जाने तीर्थयात्रीलाई नै लक्ष्य गरी धेरै हेलिकप्टर कम्पनीहरु अहिले सिमीकोट एयरपोर्टमा पुगेका छन् । राजधानीको व्यापार छोडेर आठ ओटा हेलिकप्टर कम्पनी यति बेला मानसरोवरको यात्रामा छन् ।
अहिले दैनिक ११ पटकसम्म उडान भर्ने गरेको ओलीले बताए । ‘यो सिजनमा राम्रो बिजनेस हुन्छ, महाप्रबन्धक ओलीले भने,’ हामीले दुई ओटा हेलिकप्टरबाट सेवा दिइरहेका छौं ।’ सिमीकोटबाट हिल्सा पुग्न १ लाख ४० हजारदेखि १ लाख ५० हजार रुपैयाँसम्म लिने गरेको उनले बताए । हेलिकप्टरको तीव्र प्रतिस्पर्धा भएकाले निश्चित भाडादर भने नभएको उनको भनाइ छ ।
मनाङ एयरका मार्केटिङ प्रमुख रोहन श्रेष्ठले मानसरोवर यात्राका लागि एउटा हेलिकप्टर सिमीकोटमा रहेको बताए । उनले अघिल्लो वर्ष जस्तो यस वर्ष राम्रो व्यापार नभएको जानकारी दिए । व्यापार राम्रो नभएपनि एक दुई महिना आफ्नो हेलिकप्टर उतै रहने बताए ।
तिब्बती भूभागमा पर्ने मानसरोवर चीनबाट सहजै पुग्न सकिन्छ । नेपाल भएर जान भने अहिले हुम्लाको सिमीकोट एकमात्र प्रवेशद्वार हो । २०७२ को भूकम्पअघि नेपालका अन्य नाकाबाट पनि मानसरोवर जाने गरिन्थ्यो ।
सिमीकोटदेखि हिल्सासम्म सेवा दिनेमा माउन्टेन हेलिकप्टर्स, समिट हेलिकप्टर्स, सिम्रिक एयरलाइन्स, हेलि एभरेस्ट, कैलाश हेलिकप्टर, मनाङ एयर, एयर डाइनेष्टिक हेलि सर्भिस तथा अल्टिच्युड एयरका हेलिकप्टर छन् ।
