श्रम, रोजगार तथा सामाजिक सुरक्षा मन्त्री गोकर्ण विष्टले मलेसिया जाने कामदारलाई बायोमेट्रिक, भीएलएन, माइग्राम्स, जीएसजीलगायतका संस्थाले ठगी गरेको भन्दै ती संस्थालाई खारेज गर्दै कारवाहीको घोषणा गरेका थिए ।
नेपाली कामदारको समस्या समधानको लागि मलेसियन सरकारले चासो व्यक्त गरेको छ । मलेसियाका मानव संसाधन मन्त्री एम कुलासेगरनले बिहिबार मलेसियास्थित नेपाली दुतावासमा कार्यवाहक राजदुत कुमार खरेलसँग अनौपचारिक भेट गरि नेपाली कामदारको विषयमा जानकारी लिएका हुन् ।
मलेसियाका व्यवसायी दातो प्रदीपकुमार कुकरेजाको घरमा नेपाली दुतावास भाडामा बस्दै आएको छ । हिमालय एयरलाइन्स, एयर इण्डियाको मलेसियाको जिएसए कुकरेजाले लिएका छन् । बिहिबार मन्त्री कुलासेगरन कुकरेजालाई भेट्न गएको बेला दातो प्रदीपले नै दुतावासमा कार्यवाहक राजदुतलाई अनौपचारिक भेट गराइदिएका थिए ।
अनौपचारिक भेटमा नेपालबाट मलेसिया कामदार आउन समस्या भएका विषयमा छलफल भएको र त्यसको विषयमा औपचारिक रुपमा नै साउन ८ गते पुत्राजयामा वार्ता हुने दुतावासले जनाएको छ ।
कार्यवाहक राजदुत खरेलले मलेसियाका मानव संसाधन मन्त्री एम कुलासेगरनले नेपाली दूतावासको अनौपचारिक भ्रमण पछि वार्ताको मिति तय भएको जानकारी दिए । भेटका अवसरमा मन्त्री कुलासेगरनले नेपालले मलेसियामा कामदार पठाउने सवालमा लिएको पछिल्लो निर्णय बारे चासो राखेको उनले बताए ।
श्रम, रोजगार तथा सामाजिक सुरक्षा मन्त्री गोकर्ण विष्टले मलेसिया जाने कामदारलाई बायोमेट्रिक, भीएलएन, माइग्राम्स, जीएसजीलगायतका संस्थाले ठगी गरेको भन्दै ती संस्थालाई खारेज गर्दै कारवाहीको घोषणा गरेका थिए । कारवाहीपश्चात नयाँ व्यवस्था नहुँदा कामदार मलेसिया जाने प्रक्रिया बन्द भएको छ ।
