नेपाल कम्युनिस्ट पार्टीका अध्यक्ष तथा पूर्वप्रधानमन्त्री पुष्पकमल दाहालले अर्थमन्त्रीबारेका हल्ला निराधार भएको प्रस्ट्याएपछि सेयर बजार मापक नेपाल स्टक एक्सचेन्ज (नेप्से) एकाएक घटेकोे हो ।
बजारमा अर्थमन्त्री डा युवराज खतिवडासँग रुष्ट रहेका सेयर लगानीकर्ताले केही समयदेखि चलाएको हल्ला निराधार भएपछि सेयर बजार तीव्र गतिमा घटेको छ । दुई सातादेखि स्थिरजस्तै देखिएको बजार साताको पहिलो दिन करिब १७ अङ्कले ओरालो लागेको छ ।
नेपाल कम्युनिस्ट पार्टीका अध्यक्ष तथा पूर्वप्रधानमन्त्री पुष्पकमल दाहालले अर्थमन्त्रीबारेका हल्ला निराधार भएको प्रस्ट्याएपछि सेयर बजार मापक नेपाल स्टक एक्सचेन्ज (नेप्से) एकाएक घटेकोे हो । केही समयदेखि नेकपाका नेता तथा कार्यकर्ताले अर्थमन्त्री हटाउन माग गर्दै आएका छन् भने सामाजिक सञ्जालमा अर्थमन्त्री हट्ने भनेर व्यापक चर्चा गरिँदै आएको थियो । गत साता दाहालले चितवनमा आयोजित एक कार्यक्रममा तत्काल अर्थमन्त्री हटाउने कुनै योजना नरहेको बताएका थिए । त्येसैको असर आइतबारको सेयर बजारमा परेको छ ।
आइतबार १ हजार १ सय ८० दशमलव ६९ अङ्कबाट सुरु भएको बजार १६ दशमलव ६९ अङ्कले ओरालो लाग्दै कारोबार बन्द हुँदा १ हजार १ सय ६३ दशमलव ९४ अङ्कमा पुगेको हो ।
आज बजार सुरु भएदेखि घट्न थालेको परिसूचक २ घन्टासम्म लगातार घटेर १० अङ्कको गिरावट आएको थियो । त्यसपछि केही स्थिर रहँदै नेप्से १६ अङ्कले तल झरेको हो । आज नेप्सेमा १ सय ६२ कम्पनीको ४ हजार १ सय ७६ कारोबारबाट ७ लाख ८१ हजार ५ सय ६० कित्ता सेयर किनबेच भई २५ करोड २ लाख २६ हजार ४ सय ९१ रुपैयाँ बराबरको कारोबार भएको छ, जुन बिहीबारको कारोबार रकमभन्दा ६ करोड रुपैयाँ बढी हो ।
नेप्सेमा गत साताको बिहीवार १ सय ६३ कम्पनीको ८ लाख ६९ हजार कित्ता सेयर किनबेच भई १९ करोड ६९ लाख रुपैयाँ बराबरको कारोबार भई ६ दशमलव ६९ अङ्कले परिसूचक घटेको थियो ।
नेप्सेमा वर्गीकृत समूहमध्ये आज ९ समूहमा गिरावट आउँदै २ समूहको सूचक बढ्दा सम्रग नेप्से दोहोरो अङ्कले ओरालो लागेको हो । सबैभन्दा बढी अङ्कले घटेको जीवन बिमा १ सय ९३ दशमलव ३७, निर्जीवन बिमा १ सय ५ दशमलव ७४, उत्पादनमूलक ६३ दशमलव ५८, लघुवित्त ३१ दशमलव ५३, जलविद्युत् २१ दशमलव १९, विकास बैङ्क १३ दशमलव २२, बैङ्किङ ११ दशमलव ८७, अन्य ४ दशमलव ७२ तथा वित्त ३ दशमलव ५९ अङ्कले घटेको छ ।
यस्तै, आज होटल ६ दशमलव ७३ र व्यापार समूह २ दशमलव ११ अङ्कले बढेको छ । बजार १६ अङ्कले घटे पनि आरम्भ माइक्रो फाइनान्स वित्तीय संस्थाको सेयर ३ दशमलव ८७ प्रतिशतले बढेको छ भने मल्टिप्रपोज फाइनान्सको सेयर १० प्रतिशतले घटेको छ । यस्तै आज नेप्सेमा नेपाल लाइफ इन्स्योरेन्सको सेयर सकैभन्दा बढी ४ सय ८७ पटक कारोबार भएको छ ।
