बिहारका मुख्यमन्त्री नीतीश कुमारले मङ्गलबार दुई छिमेकी मुलुकका महत्त्वपूर्ण स्थलबीच उच्चतम सम्पर्क सुविधाका लागि वातानुकूलित डिलक्स बस सेवाको शुभारम्भ गरे ।
नेपाल र भारतबीच सीधा बस सेवाको गन्तव्य थपिँदै गएको छ । मङ्गलबारदेखि भारतको बोधगयादेखि काठमाडौं र भारतको पटनादेखि जनकपुरसम्म सीधा बस सेवा सुरु भएको छ ।
बिहारका मुख्यमन्त्री नीतीश कुमारले मङ्गलबार दुई छिमेकी मुलुकका महत्त्वपूर्ण स्थलबीच उच्चतम सम्पर्क सुविधाका लागि वातानुकूलित डिलक्स बस सेवाको शुभारम्भ गरे ।
बस सेवालाई झण्डा देखाउने कार्यक्रममा नीतीशले भने, ‘यस पहलले बिहार र नेपालबीचको सम्बन्धलाई मजबुत बनाउने छ ।’
‘संवाद’मा आयोजित एक कार्यक्रममा मुख्यमन्त्री नीतीशले बस सेवालाई झण्डा देखाउनुभन्दा अघि आधुनिक सुविधासम्मपन्न बसको निरीक्षण समेत गरेका थिए ।
बस सञ्चालनको लक्ष्य बौद्ध पर्यटनलाई प्रोत्साहन गर्नु हो । बसमा ४४ ओटा आरामदायी सिट छन् ।
बिहार राज्य सडक परिवहन निगम (बीएसआरटीसी) का ती बस बोधगया – काठमाडौं तथा पटना – जनकपुरबीच चल्ने छन् । सो अवसरमा बिहारका मुख्यमन्त्रीलाई पशुपतिनाथ मन्दिरको चिनो दिइएको थियो । साथै बिहार तथा नेपालका कलाकारहरुले लोक कला प्रस्तुत गरेका थिए ।
बस सेवाका प्रमुख पाँच विशेषता
१. बिहार – नेपाल जोड्ने चार ओटा बसले पटना, रक्सौल तथा वीरगञ्ज हुँदै बोधगया – काठमाडौं जोड्ने छन् ।
२. पटनाबाट जनकपुरसम्म यस्तै चार ओटा बस मुजफ्फरपुर र सीतामढी हुँदै चल्ने छन् । यसको भाडा ४०० भारु तोकिएको छ ।
३. काठमाडौंदेखि बोधगयासम्मको बस सेवा भोलि २८ गते बिहीबार (१३ सेप्टेम्बर) नेपाल सरकारद्वारा शुभारम्भ गरिने छ ।
४. बस बिहान १० बजे बोधगयाबाट छुट्ने छ, र यसको भाडा १२५० भारु हुनेछ ।
५. पटना–काठमाडौं बस भाडा १०१५ भारु लाग्ने छ ।