लुम्लेको प्राकृतिक सौन्दर्य एवम् हावापानी, वरपर देखिने माछापुच्छ्रे, धौलागिरि, अन्नपूर्णलगायत हिमशृङ्खला आदिले पर्यटकलाई स्वर्गीय अनुभूति मात्र दिँदैनन्, सहरी वातावरणबाट टाढाको स्वच्छ सफा वातावरणले आफूलाई स्वागत गरेको अनुभव पनि गर्छन् ।
पोखरा र मुस्ताङ आफैंमा परिचय बनाएका दुई फरक स्थान हुन् । यी दुवैको आआफ्नै विशेषता छ । सराङकोटबाट गरिने प्याराग्लाइडिङ होस् वा फेवातालमा बोटिङ अथवा पोखरा वरपरका स्थानमा गइने हाइकिङले पर्यटकलाई मनोरञ्जन दिन्छन् नै । त्यसमा पनि पोखरादेखि मुस्ताङसम्मको यात्रामा जाने जोकोहीले यहाँका परिदृश्यलाई अवलोकन गरेर भरपूर मनोरञ्जन लिन सक्छन् ।
लुम्लेको प्राकृतिक सौन्दर्य एवम् हावापानी, वरपर देखिने माछापुच्छ्रे, धौलागिरि, अन्नपूर्णलगायत हिमशृङ्खला आदिले पर्यटकलाई स्वर्गीय अनुभूति मात्र दिँदैनन्, सहरी वातावरणबाट टाढाको स्वच्छ सफा वातावरणले आफूलाई स्वागत गरेको अनुभव पनि गर्छन् ।
हुन त लामो रुटमा यात्रा गर्दा थकान लाग्न सक्छ, तर पोखरादेखि मुस्ताङसम्मको यात्रामा पर्ने विभिन्न खोलानाला, जङ्गल, उकालीओराली, पहाडपर्वत, नदीको कलकल, छहराहरुको छङछङ आदिले सबै थकान बिर्साइदिन सक्छन् ।
त्यति मात्र होइन, बेनी कटेपछि देखिने अनौठा भौगोलिक दृश्यले पर्यटकलाई कताकता नयाँ संसारमा पाइला टेकेको अनुभूतिसमेत गराइदिन्छन् । बाटोमा पर्ने रुप्से झरना, तातोपानी, कागबेनी, मुक्तिनाथ जस्ता पर्यटकीय स्थल र कालीगण्डकीको एक किसिमको सुसाइले पनि आनन्दको सागरमा डुबुल्की खेल्न सघाउँछन् ।
काठमाडौंबाट हिँडेको पहिलो दिन पोखरा बसेर भोलिपल्ट त्यहाँका विभिन्न दृश्यावलोकन गर्दै अर्काे दिन मुस्ताङका लागि यात्रा गर्न सकिन्छ । यात्राका क्रममा ठाउँठाउँमा उच्चस्तरीय होटल एवम् रेस्टुराँको उचित व्यवस्था गरिएका कारण पर्यटकले कुनै किसिमको झन्झट बेहार्नुपर्ने अवस्था आउँदैन ।