यातायात विभागले भोलि बुधबारदेखि देशभर जुनसुकै सवारी जहाँसुकै जान पाउने रुट परमिट खारेज गर्ने घोषणा गरेपछि विभिन्न यातायात कम्पनी तथा व्यवसायीले पुराना थोत्त्रा बस बाहिर निकाल्न सुरु गरिसकेका छन् ।
दसैंमा यात्रा सहज बनाउन नयाँ गाडी थप्नुको साटो बसपार्कमा पुराना बस धमाधम निस्कन थालेका छन् । दसैंका लागि लामो दूरीका सडकमा राजधानीबाट बाहिर जानका लागि वर्षौंदेखि ग्यारेजमा थन्किएका सवारीसाधन रिजर्भ तथा सार्वजनिक यातायातका रुपमा निकालिन थालिएको हो ।
विभिन्न पेसा व्यवसायमा रहेका राजधानीलगायत ठूला सहरका मानिस चाडपर्व मनाउन आफ्नो मूलघर जाने तयारीमा छन् । यस्तै राजधानीमा बस्नेहरु दसैंमा उच्च चाप हुने भन्दै दसैं आउन १५ दिन अगावै बाहिरिने गरेका छन् ।
यातायात विभागले भोलि बुधबारदेखि देशभर जुनसुकै सवारी जहाँसुकै जान पाउने रुट परमिट खारेज गर्ने घोषणा गरेपछि विभिन्न यातायात कम्पनी तथा व्यवसायीले पुराना थोत्त्रा बस बाहिर निकाल्न सुरु गरिसकेका छन् ।
विभागको रुटपर्मिट खारेजलाई व्यवसायीले कैयौं वर्ष थन्किएर बसेका पुराना सवारी निकालेर चलाउने अवसरका रुपमा लिन लागेको यातायात सुधार अभियन्ता रामबहादुर थापाले बताए ।
मङ्गलबार दसैं मनाउन घर जान लागेका सुवराज महतका अनुसार अहिले बसपार्कमा सिसा नभएका, झ्याल टालिएका, थोत्रा, झट्ट हेर्दा २० वर्ष नाघिसकेका बस दसैंमा यात्रु ओसार्न राखिएको बताए ।
चाडपर्वमा राजधानीबाट बाहिरिने मानिसको चाप अत्यधिक हुने, त्यसमाथि पुराना सवारी चलाउँदा दुर्घटना बढ्ने सङ्केत देखिएको छ । यातायात व्यवस्था विभागका महानिर्देशक लावण्यकुमार ढकालका अनुसार ट्राफिक महाशाखा, यातायात विभाग र व्यवसायीको समन्वयमा नियममित अनुगमन हुने बताए । ‘हामीले कुनै कसर नराखी दसैंमा यात्रुको चाप र सुरक्षालाई मध्यनजर गर्दै विशेष सुरक्षा मिलाएका छौं,’ उनले भने । विभागले केही दिनअघि कोटेश्वरमा गरिएको अनुगमनमा तोकिएभन्दा बढी भाडा लिएको सवारीलाई कारबाही गरेको उनको भनाइ छ ।
महानगरीय ट्राफिक महाशाखाका एसएसपी वसन्तकुमार पन्तले बढी भाडा लिएर टिकट काट्ने काउन्टरलाई पनि कारबाहीको दायरामा ल्याइरहेको बताए । बसभन्दा पनि माइक्रोले बढी भाडा लिएको गुनासो आउने गरेको भन्दै उनले विशेष सजगता अपनाइएको पन्तको भनाइ छ ।
बसपार्कमा पुराना सवारी निकालेको जानकारी महानगरीय ट्राफिक प्रहरी महाशाखामा पनि आएकाले नयाँ र पुरानो बसपार्कमा सतर्कता अपनाउन निर्देशन दिइएको सहप्रवक्ता दीपेश दाहालले जानकारी दिए ।
राजधानीबाट दसैं मनाउन करिब २५ लाखभन्दा बढी मानिस बाहिरिने गरेका छन् । पुराना सवारीसाधनलाई विशेष निगरानीमा राखेको ट्राफिक प्रहरीको भनाइ छ । विगत वर्षहरुको तथ्याङ्क हेर्दा दसैं अवधिमा धेरैले ज्यान गुमाउने गरेको भेटिन्छ ।
विभागका प्रवक्ता गोकर्णप्रसाद उपाध्यायले बसपार्कबाहेक कोटेश्वर, कलङ्की, जोरपाटी, गौशालालगायतका स्थानमा दसैंको टिकटमा बढी भाडा लिने गरेको गुनासो आएकाले ती क्षेत्रका काउन्टरलाई प्रतिस्थापन गर्ने तयारी भइरहेको बताए । पुराना गाडीको सवालमा काठमाडौं बाहिरका विभिन्न राजमार्गहरुमा रहेका सुरक्षाकर्मीहरुलाई निर्देशन दिइसकिएको हुँदा कुनै समस्या नहुने उनको भनाइ छ ।
