जलविद्युत् कम्पनीले एकपछि अर्को साधारण सेयर (आईपीओ) जारी गर्ने तयारी गरिरहेका बेला नेपाल धितोपत्र बोर्डले वित्तीय अवस्थाका बारेमा नागरिकले थाहा पाउने गरी सूचना दिन सम्बन्धित पक्षलाई निर्देशन दिएको छ ।
आर्थिक समस्यामा रहेका जलविद्युत् कम्पनीले पनि नागरिकलाई भ्रममा राखेर साधारण सेयर जारी गर्ने प्रवृत्ति बढेपछि बोर्डले आयोजनामा लगानी भएको रकमको नाफा के कति समयमा हुने हो र त्यसको आधार के हुने भन्नेबारेमा जानकारी दिन निर्देशन दिएको हो । यसैगरी आयोजनाको प्रतिमेगावाट लागत, विद्युत् उत्पादन अनुमतिको बाँकी अवधि, लगानी फिर्ता हुने अवधिका बारेमा पनि प्रस्ट जानकारी दिन भनेको छ । विभिन्न १६ ओटा जलविद्युत् कम्पनीले साधारण सेयर जारी गर्ने तयारी गरिरहेका बेला बोर्डले यस्तो निर्देशन दिएको हो ।
बोर्डका प्रवक्ता नीरज गिरिका अनुसार जलविद्युत् कम्पनीले सञ्चालन अवधि तीन वर्ष व्यतित भइसकेको अवस्थामा विगत तीन वर्षको र तीन वर्ष व्यतित भइनसकेको अवस्थामा सञ्चालन अवधिभरको लेखापरीक्षण भएको वित्तीय विवरणबमोजिम प्रतिसेयर खुद सम्पत्ति, प्रतिसेयर आम्दानीका बारेमा जानकारी दिन भनेको हो । सरकारले स्थानीय प्रभावितलाई १० प्रतिशत र आमनेपालीलाई १५ प्रतिशत साधारण सेयर दिनुपर्ने बाध्यकारी व्यवस्था गरेपछि जलविद्युत् आयोजनाले सेयर दिने प्रचलन बढेको छ ।
