लुम्बिनीमा हुने बुद्ध जयन्ती समारोह, आध्यात्मिक, धार्मिकलगायतका कार्यक्रम गर्न हलको अभाव भएपछि लुम्बिनी विकास कोषले दक्षिण एसियाकै नमुना सभाहल बनाउन सुरु गरेको छ ।
नेपालको प्रमुख धार्मिक पर्यटकीय केन्द्रको रुपमा रहेको लुम्बिनीमा निर्माण भइरहेको बौद्ध ध्यान केन्द्रको काम २५ प्रतिशत सम्पन्न भएको छ । लुम्बिनीमा हुने बुद्ध जयन्ती समारोह, आध्यात्मिक, धार्मिकलगायतका कार्यक्रम गर्न हलको अभाव भएपछि लुम्बिनी विकास कोषले दक्षिण एसियाकै नमुना सभाहल बनाउन सुरु गरेको छ ।
२०७५ बैसाख १७ बाट निर्माण कार्य सुरु भएको सो ध्यान केन्द्र ५ हजार व्यक्ति अट्ने क्षमताको हुनेछ । ठूलो क्षमताको हल नहुँदा धेरै समस्या भएपछि लुम्बिनी विकास कोषले देशकै ठूलो र अत्याधुनिक ध्यान केन्द्रसहितको सभाहल निर्माण कार्य सुरु गरेको हो ।
भगवान् गौतम बुद्धको जन्मस्थलको रुपमा रहेको लुम्बिनीमा निर्माण भइरहेको सो सभाहल १० हजार वर्गमिटर क्षेत्रफलमा निर्माण भइरहेको छ । चीनको प्राचीन यिन यान शैलीमा निर्माण भइरहेको सो ध्यान केन्द्रको काम २ वर्षभित्र सम्पन्न गर्ने गरी अघि बढिरहेको लुम्बिनी विकास कोषका योजना प्रमुख सरोज भट्टराईले जानकारी दिए ।
कोषले बनाएको गुरुयोजनामा ध्यान केन्द्रको लागत ३८ करोड रुपैयाँ उल्लेख गरिएपनि पछि २८ करोडमै निर्माण गर्ने गरी सम्झौता भएको योजना प्रमुख भट्टराईको भनाइ छ । हाल जमिनमुनिको १२० पाइल फाउन्डेसनको काम समापन गरी पिल्लर र बिम बनाउने काम सुरु भएको बताए ।
ध्यान केन्द्र बनेपछि विश्वभर छरिएर रहेका बौद्धधर्मावलम्बीहरु लुम्बिनीमा आउँदा सहज रुपमा ध्यान गर्न सक्ने योजना प्रमुख भट्टराईले बताए । ध्यान केन्द्रको काम तीव्र गतिमा बढिरहेको बताउँदै सम्झौता अवधिभन्दा अघि नै सम्पन्न गर्ने लक्ष्य आयोजनाले लिएको बताए । यसैबीच संस्कृति, पर्यटन तथा नागरिक उड्डयन मन्त्री रवीन्द्र अधिकारीले सो ध्यान केन्द्र २२ महिनाभित्रै सम्पन्न गर्न निर्देशन दिइसकेका छन् । उनले भ्रमण वर्ष २०२० को एउटा प्रमुख आकर्षणको रुपमा सो ध्यान केन्द्र पनि हुने बताएका छन् ।
