मलेसिया जाने कामदारको कलिङ भिसा आएको हकमा भिसा स्ट्याम्पिङ सुरु भएको भन्ने विषयलाई श्रम, रोजगार तथा सामाजिक सुरक्षा मन्त्रालयले खण्डन गरेको छ ।
लामो समय देखी रोकिएको मलेसियाको रोजगारीमा कलिङ भिसा लागेका कामदारको भिसा स्ट्याम्पिङ भएको भन्दै केहि म्यानपावर कम्पनीले प्रक्रिया सुरु गर्न थालेपछि मन्त्रालयले विज्ञप्ती निकालेर प्रक्रिया सुरु नभएको र हल्लाको पछि नलाग्न अनुरोध गरेको हो ।
श्रम,रोजगार तथा सामाजिक सुरक्षा मन्त्रालयलका प्रवक्ता नारायण रेग्मीले बुधवार साँझ विज्ञप्ती जारी गर्दै नेपाल सरकार र मलेसिया सरकारबीच भएको ऐतिहासिक श्रम समझदारी पछि सहमती भएका विषयलाई प्रक्रियागत हिसाबले अन्तिम टुंगो लगाउने काम भैरहेको उल्लेख गरेका छन्् ।
क्लिङ भिषा आइसकेका मात्रै नभएर नयाँ कामदार जाने हकमा पनि दुवै सरकारले आवश्यक सबै प्रक्रिया पुरा गरेपछि सरकारले सार्वजनिक सुचना जारी गरेरै सबैलाई जानकारी गराउँने विज्ञप्तीमा उल्लेख छ । नेपाल सरकार र मलेसिया सरकाबीच श्रम समझदारी पछि रोजगारी खुल्ने बताएपनि करिब १ महिना हुन लाग्दा समेत खुलेको छैन् ।
मन्त्रालयले केहिदिनमा सबै प्रक्रिया पुरा गरेर सार्वजनिक रुपमा मलेसियाको रोजगारी खुलेको जानकारी गराउनेसमेत जनाएको छ ।
नेपालस्थित मलेसियाका निमित्त राजदुत अहमद फादिल इस्माइलले नेपाल र मलेसियाको श्रम समझदारीपछि कलिङ भिसा रोक्नु आवश्यक नरहेको बताएका छन् । उनले कलिङ भिसा रोक्नुपर्ने कुनै कारण नभएको भन्दै मलेसियाको भिसासँग सम्बन्धित संस्थालाई कलिङ भिसाको काम सुचारु गर्नका लागि पत्राचारसमेत गरेका छन् ।
