बैङ्कले ७९ लाख १० हजार ९९३ कित्ता हकप्रद लिलामीको सूचना निकालेकोमा लगानी कोषले प्रतिकित्ता १०१ रुपैयाँमा संस्थापक हकप्रद सेयर खरिदको प्रस्ताव गरेको थियो ।
काठमाडौं । नेपाल क्रेडिट एन्ड कमर्श (एनसीसी) बैङ्कको सबैभन्दा बढी हकप्रद सेयर नागरिक लगानी कोषले पाउने भएको छ । कोषले ३० लाख कित्ता संस्थापक हकप्रद सेयर पाउने भएको छ ।
बैङ्कले ७९ लाख १० हजार ९९३ कित्ता हकप्रद लिलामीको सूचना निकालेकोमा लगानी कोषले प्रतिकित्ता १०१ रुपैयाँमा संस्थापक हकप्रद सेयर खरिदको प्रस्ताव गरेको थियो । कम दर प्रस्ताव गरेकाले लगानी कोषले कम पाउने अवस्था आएको निष्कासन तथा बिक्री प्रबन्धक सनराइज क्यापिटल लिमिटेडका प्रमुख कार्यकारी अधिकृत (सीईओ) बिजयलाल श्रेष्ठले बताए । उनले २ अर्ब २० करोड रुपैयाँ बराबरको आवेदन परेको जानकारी दिए । कोषले प्रतिकित्ता १०१ रुपैयाँमा सबै संस्थापक सेयर उठाउन प्रस्ताव गरेको थियो ।
प्रतिकित्ता २१८ रुपैयाँसम्ममा हकप्रद सेयर खरिदका लागि आवेदन परेकोमा औसत २०१ रुपैयाँसम्म आवेदन दिनेले पाउने भएका छन् । । संस्थापक लगानीकर्ता एनबी ग्रुपका लक्ष्मीबहादुर श्रेष्ठ र प्रधानको ६५ लाख १६ हजार ७९३ कित्ता र सर्वसाधारण समूहको १३ लाख ९४ हजार १९८ कित्ता हकप्रद सेयर लिलाम गरिएको हो ।
चुक्ता पुँजी बढाएर न्यूनतम ८ अर्ब रुपैयाँ पुर्याउन बैङ्कले ५० प्रतिशत अर्थात २ अर्ब ३३ करोड रुपैयाँ बराबरको २ करोड ३३ कित्ता हकप्रद निष्कासन गरेको थियो । हकप्रद निष्कासन गत भदौ ५ देखि असोज २२ गतेसम्म तोकिएको थियो । निर्धारित समयमा पनि बिक्री नभएपछि लिलामी गर्न लागेको सनराइजले जानकारी दिएको छ ।
हकप्रद निष्कासनपछि पनि बैङ्कको चुक्ता पुँजी ८ अर्ब रुपैयाँ पुगेको छैन । बाँकी पुँजी बोनस सेयर दिएर पुर्याउने बैङ्कको योजना छ ।
