अध्यागमन विभागको तथ्याङ्कअनुसार वर्षभरि नै पर्यटक आगमनमा देखिएको उत्साहजनक वृद्धिका कारण सन् २०१८ मा ११ लाख ७३ हजार ७२ जना पर्यटक नेपाल आएका छन् । यो सङ्ख्या सन् २०१७ को तुलनामा २४.७७ प्रतिशतले बढी हो । हवाई मार्गबाट जम्मा ९ लाख ६९ हजार २ सय ८७ र स्थलमार्गबाट २ लाख ३ हजार ७ सय ८५ अन्तर्राष्ट्रिय पर्यटक नेपाल प्रवेश गरेका छन् ।
काठमाडौं : भ्रमण वर्ष नजिकिएसँगै पर्यटक आगमनमा नयाँ इतिहास कायम भएको छ । नेपाली इतिहासमै पहिलो पटक ११ लाख ७३ हजार ७२ जना पर्यटक भित्रिएको नेपाल पर्यटन बोर्डले जनाएको छ ।
अध्यागमन विभागको तथ्याङ्कअनुसार वर्षभरि नै पर्यटक आगमनमा देखिएको उत्साहजनक वृद्धिका कारण सन् २०१८ मा ११ लाख ७३ हजार ७२ जना पर्यटक नेपाल आएका छन् । यो सङ्ख्या सन् २०१७ को तुलनामा २४.७७ प्रतिशतले बढी हो । हवाई मार्गबाट जम्मा ९ लाख ६९ हजार २ सय ८७ र स्थलमार्गबाट २ लाख ३ हजार ७ सय ८५ अन्तर्राष्ट्रिय पर्यटक नेपाल प्रवेश गरेका छन् ।
हवाई मार्ग भएर नेपाल आउने भारतीय पर्यटकको सङ्ख्यामा गत वर्षकोे तुलनामा २५.१ प्रतिशतले वृद्धि भई कुल आगमन २ लाख ४ सय ८३ पुगेको छ । त्यस्तै श्रीलङ्काबाट आउने पर्यटकको सङ्ख्यामा २०१७ को तुलनामा ५५.७ प्रतिशत वृद्धि भएको छ भने सार्क मुलुकहरुबाट नेपाल भ्रमणमा आउने पर्यटकको सङ्ख्यामा २६.४ प्रतिशतले वृद्धि भई कुल आगमन सङ्ख्या ३ लाख १ हजार ९ सय ६३ पुगेको छ ।
त्यस्तै, नेपालका लागि दोस्रो प्रमुख स्रोतबजार चीनबाट सन् २०१८ मा १ लाख ५३ हजार ६ सय २ चिनियाँ पर्यटकले नेपाल भ्रमण गरेका छन्, जुन २०१७ को तुलनामा ४६.८ प्रतिशतले वृद्धि हो । यसैगरी थाई, दक्षिण कोरियाली र जापानी पर्यटकहरुको सङ्ख्यामा पनि २०१७ को तुलनामा क्रमशः ३६, ८.३ र ८.९ प्रतिशतले वृद्धि भएको छ ।
युरोपेली पर्यटकको आगमनमा पनि उल्लेखनीय वृद्धि देखिएको छ । संयुक्त अधिराज्य, जर्मनी र फ्रान्सबाट नेपाल भ्रमण गर्ने पर्यटकको सङ्ख्या क्रमशः १५.६, २३.१ र २१.१ प्रतिशतले वृद्धि भई ६३,०८६, ३६,८३३ र ३१,६५३ पुगेको छ । सन् २०१८ मा नेपाल भ्रमण गर्ने अमेरिकी पर्यटकको सङ्ख्या अघिल्लो वर्षको तुलनामा १६ प्रतिशतले वृद्धि भई ९१,७८५ पुगेको छ । त्यस्तै, अस्ट्रेलियाबाट आउने पर्यकटकको सङ्ख्या १५.१ प्रतिशतले बढेर ३८,४०८ पुगेको छ ।
सस्ंकृति, पर्यटन तथा नागरिक उडड्यन मन्त्री रवीन्द्र अधिकारीले नेपाल भ्रमण वर्ष २०२० को पूर्वसन्ध्यामा पर्यटक आगमनमा भएको वृद्धिले सबैलाई उत्साहित बनाएको र सन् २०१८ का अन्तिम दुई महिनामा नै करिब ४७ प्रतिशतको वृद्धि भएकाले भ्रमण वर्ष २०२० को लक्ष्य प्राप्तिका लागि बलियो आधार तयार भएको बताए । साथै, थप सक्रियताका साथ लाग्नु पर्नेमा जोड दिए । सरकार र निजी क्षेत्रको संयुक्त प्रयासको फलस्वरुप यो सफलता हासिल भएको र अब गुणात्मकरुपमा पनि पर्यटनको विकास गर्न लागिपर्ने उनको भनाइ छ ।
नेपाल पर्यटन बोर्डका कार्यकारी प्रमुख दीपकराज जोशीका अनुसार नेपाल पर्यटन बोर्डले आफ्नो स्थापनाकालदेखि नै अङ्गीकार गरेको साझेदारीको अवधारणा र सबैको साझा प्रयासले विगत तीन वर्षयता पर्यटन आगमनमा देखिएको लगातारको वृद्धिले सम्पूर्ण पर्यटन सरोकारवालाहरुमा उत्साह र आत्मविश्वासको सञ्चार गरेको छ । ‘सरकारी निकाय, निजी पर्यटन व्यवसायी र सञ्चार माध्यमहरुबीचको सहकार्यलाई नै नेपालको पर्यटनलाई नयाँ उचाइमा पुर्याउने मूलमन्त्रका रुपमा लिन सकिन्छ,’ जाशीले भने ।
