मङ्गबलबार विज्ञप्ति जारी गर्दै नाट्टाले भ्रमण वर्ष २०२० लाई समेत प्रभाव पार्ने गरी राष्ट्रिय एवम् अन्तर्राष्ट्रिय मिडियाहरुमा प्रायोजित रुपमा समाचारहरु आएको प्रति आपत्ति जनाएको छ ।
काठमाडौं । पर्यटक खोज तथा उद्धारसम्बन्धी भ्रामक समाचार आएको भन्दै नेपाल एसोसिएसन अफ टुर एन्ड ट्राभल एजेन्ट (नाट्टा)ले ध्यानाकर्षण भएको जनाएको छ । मङ्गबलबार विज्ञप्ति जारी गर्दै नाट्टाले भ्रमण वर्ष २०२० लाई समेत प्रभाव पार्ने गरी राष्ट्रिय एवम् अन्तर्राष्ट्रिय मिडियाहरुमा प्रायोजित रुपमा समाचारहरु आएको प्रति आपत्ति जनाएको छ ।
संस्कृति, पर्यटन तथा नागरिक उड्डयन मन्त्रालयले बनाएको पर्यटक खोज, उद्धार, उपचार तथा अनुगमनसम्बन्धी कार्यविधि २०७५ लागू गरिसकेको अवस्थामा ठगीसम्बन्धी आएका समाचारप्रति ध्यानाकर्षण भएको जनाएको छ ।
पर्यटकीय सिजन सुरु हुने बेलामा पुनः यस्ता प्रमाणबेगरका समाचारहरु आएको र नेपाली पर्यटन व्यवसाय खासगरी साहसिक पर्यटनका लागि हितकार नभएको भन्दै पर्यटन व्यवसायीहरु चिन्तित भएको बताएका छन् । नाट्टाका अध्यक्ष सीएन पाण्डेद्वारा हस्ताक्षरित विज्ञप्तिमा यस्ता किसिमका भ्रामक समाचारविरुद्ध सरकारले तत्कालै हस्तक्षेप गर्न अनुरोध गरेका छन् । विज्ञप्तिमा पर्यटन क्षेत्रमा हुने ठूलो क्षतिबाट जोगाउन सरकारलाई आग्रहसमेत गरिएको छ ।
