नेपाल ट्रेकिङ, ट्राभल्स, र्याफ्टिङ, एयरलाइन्स, पुरातात्त्विक, सांस्कृतिक, कार्गो तथा कुरियर कर्मचारी मजदुर युनियन (यूनिट्राभ )ले बिहीबार पत्रकार सम्मेलन गरी २० गतेभित्र सम्झौता पूर्णरुपमा लागू नगरेमा २१ गतेबाट हडताल गर्ने र त्यसबाट पर्ने प्रभावको जिम्मेवार नेपाल सरकार र पर्यटन मन्त्रालयले लिनुपर्ने जनाएको छ ।
काठमाडौं । पर्यटकीय सिजन सुरु भएसँगै त्यसमा आबद्ध मजदुर आन्दोलित भएका छन् । उनीहरुले पर्यटन क्षेत्रमा क्रियाशील मजदुरसँग भएका विभिन्न सम्झौता पूर्णरुपमा कार्यान्वयनमा नआएको भन्दै हडतालमा उत्रने चेतावनी दिएका छन् ।
नेपाल ट्रेकिङ, ट्राभल्स, र्याफ्टिङ, एयरलाइन्स, पुरातात्त्विक, सांस्कृतिक, कार्गो तथा कुरियर कर्मचारी मजदुर युनियन (यूनिट्राभ )ले बिहीबार पत्रकार सम्मेलन गरी २० गतेभित्र सम्झौता पूर्णरुपमा लागू नगरेमा २१ गतेबाट हडताल गर्ने र त्यसबाट पर्ने प्रभावको जिम्मेवार नेपाल सरकार र पर्यटन मन्त्रालयले लिनुपर्ने जनाएको छ ।
पर्यटन क्षेत्रका श्रमिकहरुको कार्यक्षेत्रमा सेवा सुविधा श्रम ऐनअनुसार कार्यान्वयन नगरेका क्षेत्रमा तत्काल लागू गर्न आग्रह गरेको छ । यस्तै वन तथा वातावरण मन्त्रालय, श्रम मन्त्रालय, गृह मन्त्रालय, संस्कृति पर्यटन तथा नागरिक उड्डयन मन्त्रालयबीच आपसी समन्वय गरी श्रमिक तथा व्यवसायी सङ्गठनबीच वार्ता र संवादमार्फत् यथाशीघ्र समस्या समाधान गर्न अनुरोध गरेको छ ।
आफूहरुले उठाउँदै आएका माग सम्बोधन नभएमा पर्यटन व्यवसायीका सङ्गठनहरु टान, एक्याप, पर्यटन विभाग, नेपाल पर्यटन बोर्डलगायत सरोकार क्षेत्रका कार्यालयमा तालाबन्दी गर्ने चेतावनी दिइएको छ ।
