महाप्रबन्धक क्षेत्रीले मङ्गलबार राति १० बजेपछि उडान गर्न नमिल्ने सूचना ‘नोटिस टु एयर मिन’ (नोटाम) लागू भइसकेको अवस्थामा १७ मिनेट समय दिएर फ्लाई दुबईलाई उडान अनुमति दिएको विषयमा बुधबार मन्त्रालय र क्यानले २४ घण्टे स्पष्टीकरण मागेका थिए ।
काठमाडौं । त्रिभुवन अन्तर्राष्ट्रिय विमानस्थलका महाप्रबन्धक राजकुमार क्षेत्रीले संस्कृति, पर्यटन तथा नागरिक उड्डयन मन्त्रालय र नेपाल नागरिक उड्डयन प्राधिकरणलाई स्पष्टीकरण बुझाएका छन् ।
महाप्रबन्धक क्षेत्रीले मङ्गलबार राति १० बजेपछि उडान गर्न नमिल्ने सूचना ‘नोटिस टु एयर मिन’ (नोटाम) लागू भइसकेको अवस्थामा १७ मिनेट समय दिएर फ्लाई दुबईलाई उडान अनुमति दिएको विषयमा बुधबार मन्त्रालय र क्यानले २४ घण्टे स्पष्टीकरण मागेका थिए ।
क्यापिटलसँग कुरा गर्दै महाप्रबन्धक क्षेत्रीले रनवेको काम सुरु नभएका कारण इन्जिनियरहरुसँग समन्वय गरेर जहाजलाई उडान अनुमति दिएको बताए । जहाज १० बजे पुस ब्याक गर्न तयार भइसकेको र सबै यात्रुहरु भित्र पसेपछि टावरले आफूलाई जानकारी गराएको उनको भनाइ छ । टावर र सम्बन्धित एयरलाइन्सलाई सोध्दा ५ देखि ७ मिनेटभित्रै जहाज उड्नसक्ने जानकारी दिएपछि मानवताका नाताले कुनै पनि यात्रुलाई असर नपरोस् भन्ने उद्देश्यले उडान अनुमति दिएको बताए ।
नेपाल एयरलाइन्सको जहाजमा यात्रुहरु अलपत्र परेकाले त्यस्तै अवस्था नहोस् भन्ने भावनाले आफूले अनुमति दिएको बताउँदै यसमा कुनै स्वार्थ नभएको जानकारी दिए ।
वैदेशिक रोजगारीमा जानेहरुको एक दिन ढिला हुँदा धेरै समस्या हुन सक्ने देखेकाले आफूले यस्तो कदम चालेको बताउँदै अबका दिनमा सम्बन्धित एयरलाइन्सहरुलाई समयमै जहाज उडाउनका लागि समन्वय र छलफल चलाइएको बताए ।
हाल विमानस्थलको रनवे मर्मत गरिरहेको कारण विमानस्थल राति १० देखि बिहान ८ बजेसम्म बन्द हुने गरेको छ । यसको प्रभाव पछिल्लो समय राति उडान गर्ने विमान कम्पनीहरुलाई परेको देखिन्छ ।
