केन्द्रीय बैङ्कले एक आपसमा गाभिन (मर्जर) मा जान दवाव दिइरहेका बेला श्रृजनशीलले १०० प्रतिशत हकप्रद सेयर निष्कासन गरेर चुत्तापुँजी १४ करोड रुपैयाँ पुर्याउन साधारणसभा बोलाएको हो ।
काठमाडौं । नेपाल राष्ट्र बैङ्कले पुँजी बढाउन लघुवित्तलाई हकप्रद सेयर निष्कासन गर्न रोक लगाएका बेला श्रृजनशील लघुवित्त वित्तीय संस्था लिमिटेडले ल्याउने तयारी थालेको छ ।
संस्थाले चुत्तापुँजी बढाउन हकप्रद सेयर निष्कासन गर्नका लागि जेठ १८ गते विशेष साधारणसभा बोलाएको छ । केन्द्रीय बैङ्कले एक आपसमा गाभिन (मर्जर) मा जान दवाव दिइरहेका बेला श्रृजनशीलले १०० प्रतिशत हकप्रद सेयर निष्कासन गरेर चुत्तापुँजी १४ करोड रुपैयाँ पुर्याउन साधारणसभा बोलाएको हो ।
संस्थाको चुत्तापुँजी हाल ७ करोड रुपैयाँ रहेको छ । केन्द्रीय कार्यलय सिरहाको गोलबजार चोहर्वामा रहेको श्रृजनशीलले अधिकृत पुँजी २० करोड रुपैयाँबाट बढाएर ५० करोड रुपैयाँ पुर्याउने प्रस्ताव गरेको छ । यस्तै व्यवसाय विस्तारका लागि रेमिट्यान्स र बीमा एजेन्टको काम गर्ने प्रस्ताव साधारणसभामा पेश हुने संस्थाले जनाएको छ ।
राष्ट्र बैङ्कले मर्जरमा जान दवाव दिएपछि ५ ओटा लघुवित्तले मर्जरमा जान समझदारीपत्र (एमओयू) मा हस्ताक्षर गरेका छन् ।ओमी माइक्रोफाइनान्स र नागरिक लघुवित्तबीच, आरम्भ माइक्रोफाइनान्स, नागवेली लघुवित्त र किसान माइक्रोफाइनान्सबीच मर्जरमा जान एमओयू गरी मर्जर टिम गठन गरिसकेका छन् । सेयर कारोबार पनि रोक्का भइसकेको छ ।
सेयर बजार घटेका अवस्थामा पनि लघुवित्त संस्थाको सेयर ८ अर्ब रुपैयाँ भन्दा बढी पुँजी भएका वाणिज्य बैङ्कको भन्दा बढी छ । केन्द्रीय बैङ्कले ९९ ओटा लघुवित्तलाई अनुमति दिएकोमा ७१ ओटा सञ्चालनमा आइसकेका छन् । १५ ओटा अझै पाइपलाइनमा छन् ।
