हिमालयन प्रवेशद्वार तथा साहसिक पर्यटकीय गन्तव्यको रुपमा विश्व सामु नेपाललाई स्थापित गराउने उद्देश्यले हिमालयन ट्राभल मार्ट काठमाडौंको सोल्टी क्राउन प्लाजामा हुन लागेको हो ।
काठमाडौं । भ्रमण वर्ष २०२० को पूर्वसन्ध्यामा हिमालयन ट्राभल मार्टको तेस्रो संस्करण हुने भएको छ । हिमालयन प्रवेशद्वार तथा साहसिक पर्यटकीय गन्तव्यको रुपमा विश्व सामु नेपाललाई स्थापित गराउने उद्देश्यले हिमालयन ट्राभल मार्ट काठमाडौंको सोल्टी क्राउन प्लाजामा हुन लागेको हो ।
संस्कृती, पर्यटन तथा नागरिक उड्डयन मन्त्रालय, नेपाल पर्यटन बोर्ड, नेपाल वायुसेवा निगम तथा पाटा अन्तर्राष्ट्रिय एवंम पर्यटन क्षेत्रका विभिन्न संघ–संस्थाहरुको सहयोग, समन्वय र सहकार्यमा प्यासिफिक एसिया ट्राभल एशोसियसन(पाटा) नेपाल च्याप्टरले काठमाडौंमा मार्टको आयोजना गर्न लागेको हो । जेठ २३ देखि २६ गतेसम्म हुने मार्टमा ४१ देशका ७ सय जनाले सहभागिता जनाउने छन् ।
नेपाललाई हिमालयन प्रवेशद्वारको रुपमा परिचित गराउँदै नेपालको पर्यटन प्रर्वद्धन गर्ने उद्देश्यका साथ सन् २०१७ देखि वार्षिक कार्यक्रमको रुपमा काठमाडौंमा आयोजना हुँदै आएको छ । भ्रमण वर्षलाई सफल बनाउन मार्टको तेस्रो दिन ८ तारिखमा राष्ट्रिय तथा अन्तर्राष्ट्रिय ब्लगर्स तथा मिडियाहरुलाई नेपालका पर्यटकीय गन्तव्यबारे ब्रिफिङ गरिने पाटाको तयारी रहेको छ ।
नेपाललाई अन्तर्राष्ट्रिय रुपमा चिनाउने शसक्त ब्राण्डको रुपमा विकसित हुँदै गएको पाटा नेपाल च्याप्टरका अध्यक्ष सुनिल शाक्यले जानकारी दिए । हिमालयन राष्ट्रहरुबाट विक्रेताहरु तथा विश्वब्यापी क्रेताहरुलाई एउटै मञ्चमा भेला गराई उनीहरुबीच ब्यापार आदान प्रदान तथा सम्बन्ध सञ्जाल विस्तारको उद्देश्यले पाटा नेपाल च्याप्टरद्वारा विजनेश–टु–विजनेस मार्टको परिकल्पना गरिएको बताए ।
यो पटकको बीटुबी मार्टमा ३० मुलुकबाट विश्वव्यापी क्रेता कम्पनीहरु र ६ ओटा मुलुक नेपाल, भारत, पाकिस्तान, चीन भुटान र थाइल्याण्डबाट ५४ विक्रेता कम्पनी तथा संस्थाहरुले सहभागिता जनाउने उल्लेख छ ।
मार्टमा ३८ जना अन्तर्राष्ट्रिय ट्रावल ब्लर्गस तथा मिडिया प्रतिनिधीहरुलेसमेत सहभागिता जनाउने छन् । हिमालयन ट्राभल मार्टले छोटो समयमै विश्व पर्यटन बजारमा राम्रो ख्याति प्राप्त गरिरहेको र धेरै पर्यटन श्रोत बजारहरुबाट मार्टमा सहभागिताका लागि चाहना बढ्दै जानुले यसको लोकप्रियता पनि बढ्दै गएको विश्वास छ । मार्ट देशकै प्रमुख अन्तर्राष्ट्रिय ट्राभल ट्रेड मेलाको रुपमा स्थापित हुँदै गइरहेको पाटा नेपालको भनाइ छ ।
मार्टमा अफिसीयल होटल तथा इभेन्ट भेन्यूको रुपमा सोल्टी क्राउन प्लाजा तथा अन्तर्राष्ट्रिय एयरलाईन्सतर्फ कतार एयरवेज, एयरअरेबीया, डुक एयर र हिमालय एरलाइन्स रहेका छन्, भने आन्तरिकतर्फ यती एयरलाइन्स र बुद्ध एयरले सहयोग गरेको जनाएको छ ।
यसैगरी काठमाडौं मेरियट होटल तथा होटल आकामाले मार्टमा सहभागी प्रतिनिधिहरुका लागि रात्रीभोजको प्रायोजन गरेको छ । प्रिमियम पार्टनरको रुपमा शिखर इन्सुरेन्स, इभेन्ट पार्टनर नेपाल इन्भेष्टमेन्ट बैंक र सिबेक हस्पिटलले हेल्थ पार्टनरको रुपमा सहयोग गर्दै आएको जनाएको छ । यस्तै एनसेलले कम्पुनिकेसन पार्टनरको रुपमा सहयोग गरेको छ ।
