कालीगण्डकी करिडोर प्रसारणलाइनको निर्माणले तीव्रता पाएको छ । करिडोरअन्तर्गत म्याग्दीको दानादेखि पर्वतको खुर्कोट जोड्ने २२० केभी क्षमताको ३९ किलोमिटर लामो प्रसारणलाइन र सबस्टेसन निर्माण तीव्र रुपमा भइरहेको छ ।

म्याग्दी र मुस्ताङमा निर्माणाधीन उक्त जलविद्युत् आयोजनाबाट उत्पादन हुने विद्युत् केन्द्रीय प्रसारणलाइनमा जोड्न कालीगण्डकी करिडोर प्रसरणलाइन निर्माण सुरु गरिएकोे हो । म्याग्दीको अन्नपूर्ण गाउँपालिका–३ दाना र पर्वतको कुश्मा नगरपालिका–१ खुर्कोटमा विद्युत्को सबस्टेसन निर्माण भइरहेको छ । उक्त आयोजनाको प्रसारणलाइनका लागि टावर निर्माण समेत धमाधम भइरहेको छ ।

दाना–खुर्कोटसम्म ११४ टावर निर्माण गर्नुपर्नेमा हालसम्म ३५ अाेटा निर्माण सम्पन्न भएको छ । अन्य टावर निर्माण भइरहेको आयोजनाका प्रमुख चन्दनकुमार घोषले जानकारी दिए । “समयमै आयोजनाको काम सक्न प्रयासरत छौँ” उनले भने । सबस्टेसनको पूर्वाधार निर्माणलाई तीव्र पारिएको छ ।

नेपाल विद्युत् प्राधिकरणले एशियाली विकास बैङ्कको सहयोगमा कालीगण्डकी करिडोर प्रसारणलाइन आयोजनाअन्तर्गत सन् २०१६ देखि म्याग्दीको दानाबाट पर्वतको खुर्कोट जोड्ने प्रसारणलाइन र सबस्टेसन निर्माण सुरू गरेको हो । दुई अर्ब ९० करोड रूपैयाँमा ठेक्का सम्झौता गरेका टाटा प्रोजेक्ट्स र चिन्ट इलेक्ट्रिक जेभीले सबस्टेसनको पूर्वाधार, प्रसारणलाइनको टावर निर्माणसँगै उपकरण खरिदको कामलाई अघि बढाएका छन् ।

सन् २०१८ को नोभेम्बरमा सम्पन्न गर्ने लक्ष्यसहित निर्माणलाई तीव्रता दिइएको आयोजनाका प्राविधिक सहायक प्रबन्धक लक्ष्मण फुँयालले बताए । सो आयोजनाको हालसम्म ६२ प्रतिशत काम सम्पन्न भएको छ । कालीगण्डकी करिडोर प्रसारणलाइनअन्तर्गत विद्युत् प्राधिकरणले पहिलो चरणमा दाना–खुर्कोटमा सबस्टेसन र प्रसारणलाइन निर्माणको काम अघि बढाएको छ भने खुर्कोटदेखि नवलपरासीको बर्दघाटसम्म दोस्रो चरणमा प्रसारणलाइनको पूर्वाधार बनाउने तयारी भइरहेको छ ।

यहाँ उत्पादन हुने विद्युत् राष्ट्रिय प्रसारणलाइनमा जोड्न पूर्वाधार निर्माणले गति लिएसँगै म्याग्दीमा निर्माणाधीन जलविद्युत् आयोजनाले समेत पूर्वाधार निर्माणलाई तीव्रता दिएको छ । आयोजनाले प्रसारणलाइनको टावर रहने जग्गा अधिग्रहणका लागि चार करोड ५० लाख रूपैयाँभन्दा बढी मुआब्जा वितरण गरिसकेको छ । टावरका लागि ९३ रोपनी जग्गा अधिग्रहण गरिनेछ ।

कालीगण्डकी करिडोर राष्ट्रिय प्रसारणलाइनमार्फत् म्याग्दी र मुस्ताङमा निर्माण भएका र निर्माणाधीन जलविद्युत् अयोजनाबाट उत्पादन हुने विद्युतलाई राष्ट्रिय प्रसारणमा जोडिनेछ । उक्त प्रसारणलाइनअन्तर्गत १३ मेगावाट क्षमताको थापाखोला जलविद्युत् आयोजनाले उत्पादन सुरु गरिसकेको छ भने म्याग्दीको अन्नपूर्ण गाउँपालिकामा पाँच मेगावाटको घलेम्दीखोला, ४२ मेगावाटको मिस्त्रीखोला, १४ मेगावाटको घारखोला तथा १०० मेगावाटको नीलगिरि र नीलगिरि क्यास्केट हाल निर्माणाधीन अवस्थामा छन् ।

त्यस्तै रघुगङ्गा गाउँपालिकामा ४० मेगावाटको राहुघाटले समेत निर्माण सुरु गरेको छ भने अन्नपूर्ण गाउँपालिकामै १६४ मेगावाटको कालीगण्डकी गर्ज, ६२ मेगावाटको नीलगिरि, ३८ मेगावाटको नीलगिरि क्यास्केटलगायतका आयोजनाले काम सुरु गर्ने तयारी गरेका छन् । रासस