भद्र सहमतिपछि हिमालयन बैङ्क, एनएमबी बैङ्क, कृषि विकास बैङ्क, प्रभु बैङ्क, माछापुच्छ् बैङ्क, सनराइज बैङ्क, बैङ्क अफ काठमाण्डू, नबिल बैङ्क, कुमारी बैङ्क, नेपाल एसबीआई बैङ्क, सिद्धार्थ बैङ्क र सिभिल बैङ्कलगायतले ब्याजदर बढाउने जानकारी दिएका हुन् ।
काठमाडौ । वाणिज्य बैङ्कहरुले संस्थागत निक्षेपकर्ताको ब्याज दर बढाएका छन् । वाणिज्य बैङ्कहरुले नयाँ ब्याजदर सार्वजनिक गरी संस्थागत निक्षेपको नवीकरण गर्दा ०.१ प्रतिशतसम्म ब्याज बढाउन सकिने जानकारी गराएका हुन् । संस्थागत निक्षेप नवीकरण गर्दा बैङ्कहरुले ८.६ प्रतिशतसम्म ब्याज दिन पाउने छन् ।
नेपाल बैङ्कर्स एसोसियसनको आइतबारको बैठकले संस्थागत निक्षेपको नवीकरण शुल्क ०.१ प्रतिशत बढाउने सहमति गरेपछि बैङ्कहरुले सोमबार नयाँ ब्याजदर सार्वजनिक गरेका हुन् ।
संस्थागत निक्षेपकर्तालाई दिने ब्याज ८.५ प्रतिशतमाथि नपाइने तर निक्षेपको नवीकरण भएमा ०.१ प्रतिशत थप गर्न पाइने भएको छ । व्यक्तिगत निक्षेपकर्ताको ९.२५ प्रतिशत यथावत छ । पछिल्लो पटक वाणिज्य बैङ्कले निक्षेप नवीकरण गर्दा बढी ब्याज लिएको भन्दै बैङ्कहरुबीच नै गुनासो बढेपछि एसोसियसनको बैठक बसेर भद्र सहमति गरेको हो ।
भद्र सहमतिपछि हिमालयन बैङ्क, एनएमबी बैङ्क, कृषि विकास बैङ्क, प्रभु बैङ्क, माछापुच्छ् बैङ्क, सनराइज बैङ्क, बैङ्क अफ काठमाण्डू, नबिल बैङ्क, कुमारी बैङ्क, नेपाल एसबीआई बैङ्क, सिद्धार्थ बैङ्क र सिभिल बैङ्कलगायतले ब्याजदर बढाउने जानकारी दिएका हुन् ।
सेञ्चुरी कमर्शियल बैङ्क, सनराइज बैङ्क र नेपाल क्रेडिट एन्ड कमर्श (एनसीसी) बैङ्कले संस्थागत निक्षेप तान्न ब्याजदर बढाएपछि यसलाई रोक्न बैङ्कर्स सङ्घले नयाँ भद्र सहमति गरेको हो । केही बैङ्कले निक्षेप नवीकरण गर्दा ९.९९ प्रतिशतसम्म ब्याज दिने प्रस्ताव गरेका थिए ।
लगानीयोग्य पुँजीको सङ्कट बढेपछि वाणिज्य बैङ्कहरु बढी ब्याज दिएर निक्षेप तान्न प्रतिस्पर्धा गरेका हुन् । ऋणयोग्य रकमको अभाव देखिँदै आएको छ । बैङ्कहरुले सार्वजनिक गरेको ६ महिनाको वित्तीय विवरणमा कर्जा–पुँजी निक्षेप अनुपात पनि ८० प्रतिशत छ ।
अधिकांश बैङ्कहरुले थप लगानी गर्न नसक्ने अवस्थामा पुगेका हुन् । लगातार ३ वर्षदेखि बैङ्किङ क्षेत्रमा लगानीयोग्य पुँजीको समस्या हुँदै आएको छ । पछिल्लो समयमा बैङ्कको आधार ब्याजदर बढेर १०.३० प्रतिशत पुगेको केन्द्रीय बैङ्कले जनाएको छ ।