नगरपालिकाका शिक्षा शाखा प्रमुख पुष्पराज भट्टले तीन वटै विद्यालयमा गरी रु ४८ लाखका दुई/दुईकोठे भवन निर्माण भइरहेको जानकारी दिए । शाखा प्रमुख भट्टले नगर शिक्षा समितिको निर्णयअनुसार विद्यालय भवन चालू आवभित्र सक्ने गरी काम भइरहेको बताए ।
भीमदत्तनगर । चालू आर्थिक वर्षमा कञ्चनपुरको भीमदत्तनगरपालिकाभित्र रहेका तीन सामुदायिक विद्यालयमा भवन संरचना निर्माण थालिएको छ । शिक्षा विभागको आर्थिक सहयोगमा नगरपालिकाभित्र रहेका पञ्चकृत बैजनाथ मावि बागफाँटा, सत्यवादी मावि वनगाँउ र भीमदत्त स्मृति आधारभूत विद्यालय खल्लामसेटीमा भवन निर्माण थालिएको छ ।
नगरपालिकाका शिक्षा शाखा प्रमुख पुष्पराज भट्टले तीन वटै विद्यालयमा गरी रु ४८ लाखका दुई/दुईकोठे भवन निर्माण भइरहेको जानकारी दिए । शाखा प्रमुख भट्टले नगर शिक्षा समितिको निर्णयअनुसार विद्यालय भवन चालू आवभित्र सक्ने गरी काम भइरहेको बताए ।
त्यसैगरी बागफाँटामा रहेको पञ्चकृत बैजनाथ माविको दुईकोठे भवन निर्माणको सोमबार नगरपालिकाका नगरप्रमुख सरेन्द्र विष्टले शिलान्यास गरेका छन् । नगरपालिकाभित्र चालू आवमा तीन विद्यालय छनोट गरी त्यहाँ कम्प्युटर सामग्री वितरण गरिएको शिक्षा शाखाले जनाएको छ ।
कम्प्युटर, ल्यापटपलगायतका सामग्री खरीदका लागि पञ्चकृत बैजानथ मावि, महेश्वर मावि र बैजनाथसिद्धनाथ माविलाई रु साढे छ लाखका दरले रकम विनियोजन गरिएको छ ।
भट्टका अनुसार नगरपालिकाका चार सामुदायिक स्कूलमा यस वर्ष पुस्तकालयसमेत निर्माण भइरहेका छन् । सत्यवादी मावि वनगाउँ, सरस्वती मावि उल्टाखाम, जनसेवा मावि हल्दुखाल र त्रिभुवन मावि तिलाचौरमा पुस्तकालय बनाउने काम भइरहेको भट्टको भनाइ छ ।
त्यसैगरी यहाँको भृकुटी मावि, लक्ष्मी मावि र बैजनाथ माविमा विज्ञान प्रयोगशाला बनिरहेका छन् । जसका लागि प्रतिविज्ञान प्रयोगशाला रु साढे छ लाख नै रकम आएको छ । नगरपालिकाको आफ्नो बजेट विशेष शिक्षा कक्षा चलेका विद्यालयमा छात्राबास व्यवस्थापनका लागि पनि रकम खर्चेको छ । नगरपालिकामा ५५ सामुदायिक वन र ७० निजी विद्यालय सञ्चालनमा छन् । रासस
