वैदेशिक रोजगारीबाट फर्किएकालाई लक्षित गरी कृषि, पर्यटन, वन, जडीबुटी, खनिज, जलस्रोत, विज्ञान तथा प्रविधि क्षेत्रमा उद्यम गर्न चाहनेलाई सहुलियतपूर्ण कर्जा प्रवाह गर्न ती त्रिपक्षीय सम्झौता भएको हो ।
राष्ट्रिय युवा परिषद्, एनएमबी बैंक लिमिटेड र रिटर्नी माइग्रेन्ट नेपालबीच सरलरुपमा कर्जा प्रवाह गर्न त्रिपक्षीय सम्झौता भएको छ । वैदेशिक रोजगारीबाट फर्किएकालाई लक्षित गरी कृषि, पर्यटन, वन, जडीबुटी, खनिज, जलस्रोत, विज्ञान तथा प्रविधि क्षेत्रमा उद्यम गर्न चाहनेलाई सहुलियतपूर्ण कर्जा प्रवाह गर्न ती त्रिपक्षीय सम्झौता भएको हो ।
युवा उद्यमशीलता प्रवर्द्धन गर्ने उद्देश्यले भएको उक्त सम्झौतामा रिटर्नी माइग्रेन्ट नेपालका अध्यक्ष उत्तम अधिकारी, एनएमबी बैंक लिमिटेड प्रमुख कार्यकारी अधिकृत सुनिल केसी र राष्ट्रिय युवा परिषद्का कार्यकारी उपाध्यक्ष माधव ढुङ्गेलले हस्ताक्षर गरे ।
सम्झौताअनुसार तीनवटै पक्षले आपसी सहकार्यमा नेपाल सरकार अर्थ मन्त्रालयको सहुलियतपूर्ण कर्जाका लागि ब्याज अनुदानसम्बन्धी एकीकृत कार्यविधि, २०७५ कार्यान्वयनमा सहयोग पुर्याउने र उद्यमशीलताका माध्यमबाट युवालाई उत्पादनसँग जोडेर रोजगारी तथा स्वरोजगारको अवसर सिर्जना गर्नेछन् ।
उक्त निर्देशिकाअनुसार राष्ट्रिय युवा परिषदको समन्वयमा रिटर्नी माइग्रेन्ट नेपालको सिफारिशमा बैंकले प्रतिव्यक्ति अधिकतम १० लाख रूपैयाँसम्म परियोजना धितोमा कर्जा प्रवाह गर्ने गरी हाललाई एक अर्ब रूपैयाँसम्म ऋण प्रवाह गर्नेछ । रासस