ग्लोबलले हालै नेपाल राष्ट्र बैङ्कलाई पत्राचार गरी मर्जरको प्रक्रिया सुरु भएकाले तत्काल सीईओ नियुक्त नगर्ने जानकारी गराएको हो । लामो समयसम्म बैङ्कलाई सीईओविहीन बनाउन नपाइने व्यवस्था छ ।
काठमाडौं । ग्लोबल आईएमई बैङ्क मर्जरमा जाने भएपछि तत्काल प्रमुख कार्यकारी अधिकृत (सीईओ) नियुक्त नगर्ने भएको छ । ग्लोबलले हालै नेपाल राष्ट्र बैङ्कलाई पत्राचार गरी मर्जरको प्रक्रिया सुरु भएकाले तत्काल सीईओ नियुक्त नगर्ने जानकारी गराएको हो ।
ग्लोबलले विभिन्न बैङ्कसँग छलफल भइरहेको र जुन बैङ्कसँग मर्जर हुन्छ, त्यहीँको सीईओ हुने जानकारी गराएको ग्लोबल स्रोतले बतायो । लामो समयसम्म बैङ्कलाई सीईओविहीन बनाउन नपाइने व्यवस्था छ ।
जनक शर्मा पौडेलले राजीनामा गरेपछि ३ महिनादेखि ग्लोबल आईएमई सीईओविहीन छ । मर्जरमा जान तयारीमा रहेकाले ग्लोबलले तत्काल नयाँ सीईओ नियुक्त नगरेको स्रोतको भनाई छ । ग्लोबलले मर्जरका लागि नेपाल बंगलादेश बैङ्क र कुमारी बैङ्कसँग छलफल गरिरहेको जनाएको छ ।
ग्लोबलले मर्जरका लागि दुई ओटै बैङ्कसँग एक साथ छलफल गरिरहेको छ । निश्कर्षमा भने पुगेको छैन । अर्थ मन्त्रालय र नेपाल राष्ट्र बैङ्कले मर्जरमा जान दबाव बढाएपछि ग्लोबल आईएमईलगाय अधिकांश बैङ्कले प्रक्रिया अघि बढाएका छन् ।
पुँजीगत आधार बढाउन र प्रतिस्पर्धी बनाउन ग्लोबल आईएमईले मर्जरमा जाने तयारी थालेको हो । यसअघि उसले कमर्ज एन्ड ट्रष्ट बैङ्कलाई प्राप्ति गरेको थियो ।
