अदालतले बाटो खोलेकाले २१ प्रतिशतसम्म बोनस सेयर वितरण गर्न सकिने एनसीसीका अध्यक्ष उपेन्द्रकेशरी न्यौपानेले बताए । आउँदो असारभित्र दुई वर्षको वार्षिक साधारणसभा गरेर बोनस सेयर वितरण गर्ने उनले जानकारी दिए ।
काठमाडौं । नेपाल क्रेडिट एन्ड कमर्श (एनसीसी) बैङ्कका सेयरधनीलाई २ आर्थिक वर्षको लाभांश वितरण गर्न बाटो खुलेको छ । एनबी ग्रुपले एनसीसीकाविरुद्ध दायर गरेको मुद्धालाई उच्च अदालत पाटनले खारेज गरेपछि लाभांश वितरणको बाटो खुलेको हो ।
मंगलबार उच्च अदालतका मुख्य न्यायधीश कुमार चुँडाल र न्यायधीश टेकप्रसाद ढुङ्गानाको संयुक्त इजलासले एनबी ग्रुपका लक्ष्मीबहादुर श्रेष्ठले हालेको सबै मुद्धालाई खारेज गरी लाभांश वितरणको बाटो खुला गरेको हो । एनबी ग्रुपले वार्षिक साधारणसभा, मर्जरमा जान र पुँजी बढाउन हकप्रद सेयर निष्कासन गर्नलगायत एनसीसीविरुद्ध आधादर्जन मुद्धा दायर गरेको थियो ।
अदालतले बाटो खोलेकाले २१ प्रतिशतसम्म बोनस सेयर वितरण गर्न सकिने एनसीसीका अध्यक्ष उपेन्द्रकेशरी न्यौपानेले बताए । आउँदो असारभित्र दुई वर्षको वार्षिक साधारणसभा गरेर बोनस सेयर वितरण गर्ने उनले जानकारी दिए ।
अदालतको निर्णय पाउन साथ प्रक्रिया अघि बढाउने उनले सुनाए । आर्थिक वर्ष ०७२/०७३ सम्मको १९ औं वार्षिक साधारणसभा गरेको एनसीसीले मुद्दाका कारण २० र २१ औं साधारणसभा गर्न सकेको छैन । दुई वर्षको नाफाबाट सेयरधनीलाई दिने लाभांश प्रस्तावसहित लेखापरीक्षण प्रतिवेदन (अडिट रिपोर्ट) स्वीकृतिका लागि नेपाल राष्ट्र बैङ्कमा बुझाएको छ ।
बैङ्कले आर्थिक वर्ष ०७३/०७४ मा १५ प्रतिशत र गत आर्थिक वर्ष ०७४/०७५ मा ६ प्रतिशतसम्म बोनस सेयर दिने अडिट रिपोर्टमा उल्लेख छ । सञ्चालक समितिले पारित गरेको छैन । केन्द्रीय बैङ्कले स्वीकृति दिएपछि मात्र उसले वितरण गर्न पाउने छ । एनसीसीले मर्जर गरेको तत्कालीन एपेक्स डेभलपमेन्ट बैङ्कको २ अर्ब २० करोड रुपैयाँ खराब कर्जामध्ये एनसीसीले १ अर्ब २० करोड असुल गरेको छ ।
६० करोडको अचल सम्पत्ति लिलामी गरेर लिएको र ४० करोड रुपैयाँ नउठ्ने देखिएको अध्यक्ष न्यौपानेले बताए । समयमा साधारणसभा नगर्ने र न्यूनतम ८ अर्ब रुपैयाँ पुँजी नपुर्याउनेमा एनसीसी मात्र भएको छ । ४० प्रतिशत हकप्रद सेयर निष्कासनपछि एनसीसीको चुक्ता पुँजी ७ अर्ब १ करोड रुपैयाँ पुगेको छ ।
न्युनतम पुँजी पुर्याउन अझै ९९ करोड रुपैयाँ बाँकी छ । बैङ्कले दुई आर्थिक वर्षको बोनस वितरणपछि पुँजी ८ अर्ब रुपैयाँ पुर्याउने लक्ष्य लिएको छ । न्यौपानेले बैङ्कको पुँजी ८ अर्ब रुपैयाँ पुगिसकेको तर साधारणसभाबाट स्वीकृति हुन मात्र बाँकी रहेको बताए । एनसीसीमा धेरै स्वामित्व भएको एनबी समूह र निर्मल प्रधान समूहबीचको विवाद उत्कर्षमा पुगेपछि राष्ट्र बैङ्कले २०७० साल माघ २१ गते सञ्चालक समिति भंग गर्दै हालका कार्यकारी निर्देशक लक्ष्मीप्रपन्न निरौलाको नेतृत्वमा तीन जना सञ्चालक नियुक्त गरेर पठाएको थियो ।
समितिले ३ वर्षपछि २०७३ पुस १८ गते व्यवस्थापन हस्तान्तरण गरेको हो । राष्ट्र बैङ्कले एनसीसीसँग इन्फास्ट्रक्चर डेभलपमेन्ट, एपेक्स डेभलपमेन्ट, सुप्रिम डेभलपमेन्ट र इन्टरनेसनल डेभलपमेन्ट बैङ्कलाई प्राप्ति (एक्वायर) गराएको हो । हकद सेयर खरिद नरेपछि एनबी ग्रुपपको एनसीसीमा हिस्सा साढे ८ प्रतिशतमा सीमित भएको छ । आर्थिक वर्ष ०७३/०७४ मा १ अर्ब ३२ करोड ५७ लाख रुपैयाँ खुदनाफा गरेको थियो ।
यस्तै २०७४/०७५ मा घटेर १ अर्ब ७ करोड रुपैयाँमा झरेको छ । चालू आर्थिक वर्षको तेस्रो त्रैमासमा एनसीसीले १ अर्ब १६ करोड रुपैयाँ नाफा गरेको छ । एनसीसीले ८४ करोड रुपैयाँ सेयरधनीलाई लाभांश वितरण गर्न सक्ने देखिएको छ ।
