प्राइमले ज्योति विकास बैङ्क, गण्डकी विकास बैङ्क, लुम्बिनी विकास बैङ्क, कञ्चन डेभलपमेन्ट बैङ्क, सिन्धु विकास बैङ्क, कम्युनिटी डेभलपमेन्ट बैङ्क, सिर्जना फाइनान्स लिमिटेड, वेष्ट फाइनान्स लिमिटेड, र रिलायन्स फाइनान्स लिमिटेडसँग गम्भीर छलफल गरेको स्रोतले बतायो ।
काठमाडौं । प्राइम कमर्सियल बैङ्कले एक दर्जन बैङ्क तथा वित्तीय संस्थासँग (एकआपसमा गाभ्ने (मर्जर) र प्राप्ति (एक्वायर) लाई एकसाथ छलफल अघि बढाएको छ ।
बुधबार कन्काइ विकास बैङ्कसँग एक्वारका लागि समझदारीपत्र (एमओयू) मा हस्ताक्षर गरेको प्राइमले शनिबारसम्म कैलाश विकास बैङ्कलाई पनि एक्वायर गर्ने भएको छ । ढिलोमा शनिबारसम्म कैलाश विकाससंग एमओयू भइसक्ने प्राइम स्रोतले क्यापिटल नेपाललाई बतायो । सेयर आदान प्रदान अनुपात (स्वाप रेसियो) विषयमा कुरा टुङ्ग्याउन बाँकी छ ।
प्राइमको १०० कित्ता बराबर कन्काइको ७१ कित्ता हुने गरी स्वाप रेसियो कायम गर्ने सहमति भएको छ । प्राइमले ओम डेभलपमेन्ट बैङ्कलाई प्राप्ति गर्न असफल भएपछि कन्काइलाई एक्वायर गर्न लागेको हो । ओमलाई एनएमबी बैङ्कले प्राप्ति गर्ने भएको छ ।
प्राइमले ज्योति विकास बैङ्क, गण्डकी विकास बैङ्क, लुम्बिनी विकास बैङ्क, कञ्चन डेभलपमेन्ट बैङ्क, सिन्धु विकास बैङ्क, कम्युनिटी डेभलपमेन्ट बैङ्क, सिर्जना फाइनान्स लिमिटेड, वेष्ट फाइनान्स लिमिटेड, र रिलायन्स फाइनान्स लिमिटेडसंग गम्भीर छलफल गरेको स्रोतले बतायो ।
कुरा मिल्दै गएपछि सोहीअनुसार एमओयू गर्ने तयारी प्राइमको छ । सबैसँग एकसाथ छलफल भइरहेकाले कुन संस्थासँग पहिला एमओयू हुन्छ भन्न नसकिने अवस्था रहेको स्रोतको भनाई छ । धेरै बैङ्क तथा वित्तीय संस्थालाई एक्वायर गरेर ठुलो बैङ्क बन्ने योजना प्राइमको छ ।
हाल प्राइमको चुक्ता पुँजी ८ अर्ब ३ करोड रुपैयाँ छ । गत चैत मसान्तसम्म प्राइमको निक्षेप ६८ अर्ब ६५ करोड रुपैयाँ छ । नेपाल राष्ट्र बैङ्कले दबाब दिएको र सरकारले पनि बजेटमा ठूला बैङ्को मर्जर र प्राप्तिलाई प्रोत्साहन गरी कर छुटको समय १ वर्ष थप गरेको छ ।
बजेटमा ठुला बैङ्क तथा वित्तीय संस्थालाई मर्जर र प्राप्तिलाई प्रोत्साहित गर्दै कर छुटको व्यवस्था गरेको छ । यस्तै आगामी वर्षको मौद्रीक नीतिमा केन्द्रीय बैङ्कले मर्जरका लागि विशेष योजना ल्याउने तयारी गरेको छ ।
झण्डै दुई दर्जन बैङ्क तथा वित्तीय संस्था मर्जर र प्राप्ति प्रक्रियामा सहभागी भएका छन् । केहीले एमओयू गरेका छन भने कतिपयले मर्जर र प्राप्त गर्न विशेष साधारणसभा बोलाएका छन् ।
