यसअघि भारतीय रेलमार्गबाट लाइसेन्सप्राप्त रेल मात्रै कुद्दै आएकामा अबदेखि नेपालीलाई पनि रेल कुदाउन खुला गरिएको वाणिज्य तथा आपूर्ति मन्त्रालयका प्रवक्ता दिनेशकुमार भट्टराईले जानकारी दिए ।
काठमाडौं । भारत सरकारले नेपाली झण्डा राखेर भारतको आफ्नै लिकमा रेल कुदाउन खुला गरेको छ ।
यसअघि भारतीय रेलमार्गबाट लाइसेन्सप्राप्त रेल मात्रै कुद्दै आएकामा अबदेखि नेपालीलाई पनि रेल कुदाउन खुला गरिएको वाणिज्य तथा आपूर्ति मन्त्रालयका प्रवक्ता दिनेशकुमार भट्टराईले जानकारी दिए ।
‘यदि नेपालीले रेल किने भने भारतीय लिकमै कुदाएर नेपाल सामान ढुवानी गर्न बाटो खुला भएको छ,’ मन्त्रालयका सहसचिव भट्टराईले भने, ‘त्यति मात्रै होइन, ढुवानीमा हुँदै आएको एकाधिकार पनि तोडिएको छ । अबदेखि निजी क्षेत्रबाट सञ्चालित कार्गोले पनि सुख्खा बन्दरगाहमा ढुवानी गर्न सक्छन् ।’
‘कार्गो ढुवानीमा भारतीय एकाधिकार भएकै कारण नेपालमा सामान ढुवानी गर्न महँगो पर्दै आएको थियो । त्यति मात्रै होइन, अब नेपालको निजी क्षेत्रलाई ढुवानी गर्नसमेत खुला भएको छ ।’
नेपाल उद्योग वाणिज्य महासङ्घका वरिष्ठ उपाध्यक्ष शेखर गोल्छाले पहिला कन्करले मात्रै ढुवानी गरिन्थ्यो, अब नेपाली आफैले रेल किनेर सामान ढुवानीको बाटो खुला भएको बताए ।
भारतीय एकाधिकार भएकाले भनेका बेला कार्गो नपाउने, पाए पनि अत्यन्तै महँगो भाडा तिर्नुपर्ने समस्यालाई सरकारको यो निर्णयले समाधान गरेको उनको भनाइ छ ।
उनका अनुसार भारतमा निजी क्षेत्रबाट सञ्चालित रेलबाट सामान ल्याउँदा अहिलेको भन्दा २५ प्रतिशतसम्म सस्तो पर्छ ।
ढुवानी गर्ने र रेल चलाउने भारत सरकारको कम्पनी कन्करका अतिरिक्त प्राइभेट ढुवानी रेल पनि चल्न दिनुपर्ने नेपाली पक्षले माग गर्दै आएको गोल्छाले बताए ।
‘भारत सरकार विशाखापट्टनमबाट मात्र होइन, अन्य बन्दरगाहबाट पनि रेल चल्न दिन मन्जुर भयो,’ उनले भने, ‘यो एकदमै राम्रो कुरा हो ।’
प्राइभेट कम्पनीको कार्गोबाट सामान ढुवानी गर्दा कार्यदक्षता पनि बढ्छ । २५ प्रतिशत सस्तो हुन्छ । प्राइभेट कम्पनीले पनि रेल किनेर चलाउन सक्ने छन् ।
