१६ हजार ग्राहक रहेका सुर्खेत उपत्यका खानेपानी उपभोक्ता संस्थाले आफ्नो संस्थालाई डिजिटलाइज गर्नुका साथै ईसेवाबाट महसुल भुक्तानी गर्न सकिने सेवा दिएको हो ।
पछिल्लो समय समृद्ध कर्णालीको नारा लिएर अगाडि बढिरहेको प्रदेश ६ का सुर्खेतबासीले ईसेवाबाट खानेपानीको महसुल तिर्न सक्ने भएका छन् । १६ हजार ग्राहक रहेका सुर्खेत उपत्यका खानेपानी उपभोक्ता संस्थाले आफ्नो संस्थालाई डिजिटलाइज गर्नुका साथै ईसेवाबाट महसुल भुक्तानी गर्न सकिने सेवा दिएको हो ।
अबदेखि वीरेन्द्रनगर नगरपालिकाका स्थानीय खानेपानीको महसुल भुक्तानीकै लागि संस्थाको कार्यालयसम्म जानुपर्ने बाध्यताको अन्त्य भएको छ ।
संस्थाले अनलाइन पेमेन्टका साथै कार्यालयका सम्पूर्ण कार्यलाई अटोमेसनमा लगेको छ । दियालो टेक्नोलोजिजले बनाएको ‘वाटरमार्क’ नामक अत्याधुनिक सफ्टवेयर प्रयोग गरी सबै कार्यलाई अटोमेसनमा लगेको हो । यो सफट्वेयरले बिलिङ, लेखा पद्धति, जिन्सी व्यवस्थापन देखि मिटररिडिङसम्मका कार्यलाई डिजिटलाइज गर्छ ।
संस्थाका अध्यक्ष कुलमणि देवकोटाले भने, ‘प्रविधिको प्रयोग नगर्दा हामीलाई सेवा दिन निकै गाह«ो भइरहेको थियो । ग्राहक धेरै हुँदा तीनचार घण्टा लाइनमा बसी महसुल तिर्नुपर्ने बाध्यता थियो । ईसेवासँगको सहकार्यले अब लाइन लाग्नुपर्ने बाध्यताको अन्त्य भएको छ ।’
सन् २००९ देखि सञ्चालित ईसेवाले नेपालका ७७ ओटै जिल्लामा सेवा दिँदै आएको छ । मोबाइल तथा इन्टरनेटबाट भुक्तानी गर्न सकिने इसेवाका मुलुकभर ३० हजार बढी जोन प्वाइन्ट छन् । ईसेवामार्फत् मोबाइल रिचार्ज, टपअफ, बिजुली तथा खानेपानीको बिल भुक्तानी, एयरलाइन्स, बसका तथा फिल्मका टिकट खरिदजस्ता सयभन्दा बढी सुविधा लिन सकिन्छ ।
