यातायात व्यवस्था विभागका अनुसार पश्चिम नेपाल यातायात व्यवसायी सङ्घ, नारायणी यातायात व्यवसायी सङ्घ, अरनिको यातायात, पृथ्वीराजमार्ग बस व्यवसायी सङ्घलगायत अन्य समितिहरुले अझै पनि विभागमा कम्पनी दर्ता गरेर पञ्जीकरण गरेका छैनन् । अरनिको बस व्यवसायी सङ्घले कम्पनी रजिष्ट्रारको कार्यलायमा कम्पनी दर्ता गरे पनि विभागमा पञ्जीकरणका लागि भने नगएको विभागले जनाएको छ ।
सरकारले सिन्डिकेट विस्थापन भएको बताइरहँदा मुलुकका ठूला यातायात समिति कम्पनी मोडलमा जान अटेर गरिरहेका छन् ।
सरकारले साउनबाट यातायात समितिको नवीकरण रोक्ने निर्णय गरे पनि ठूला यातायात समितिहरुले अझै पनि यातायात विभागमा कम्पनी पञ्जीकरणमा चासो दिएका छैनन् । यातायात क्षेत्रमा सिन्डिकेट गर्दै आइरहेका यातायात व्यवसायी यतिबेला पुनः सिन्डिकेट बिउँताउने तरखरमा रहेको सङ्केत देखिन्छ ।
यातायात व्यवस्था विभागका अनुसार पश्चिम नेपाल यातायात व्यवसायी सङ्घ, नारायणी यातायात व्यवसायी सङ्घ, अरनिको यातायात, पृथ्वीराजमार्ग बस व्यवसायी सङ्घलगायत अन्य समितिहरुले अझै पनि विभागमा कम्पनी दर्ता गरेर पञ्जीकरण गरेका छैनन् । अरनिको बस व्यवसायी सङ्घले कम्पनी रजिष्ट्रारको कार्यलायमा कम्पनी दर्ता गरे पनि विभागमा पञ्जीकरणका लागि भने नगएको विभागले जनाएको छ ।
कम्पनी मोडलमा नगएका, अटेर गरी बसेका बस समितिहरु पनि कम्पनी मोडलमा आउने विश्वास रहेको विभागका प्रवक्ता तुलसीराम अर्याल बताउँछन् । उनका अनुसार आगामी आर्थिक वर्षको सुरुआतसँगै देशभरका सवारीलाई व्यवस्थापन गर्ने उद्देश्य रहेकाले असार मसान्तसम्म कम्पनी मोडलमा नआए रुटपर्मिट नदिइने र तिनले अन्य सेवा सुविधा पनि पाउने छैनन् ।
‘यातायात क्षेत्रलाई सेवामूलक बनाउन तथा सहजीकरण गर्न कम्पनी मोडलमा नआउने समिति तथा व्यवसायीसँग छलफल र समन्वय गर्न सरकारी पक्ष सदैव तयार छ,’ उनले क्यापिटल नेपालसँग कुरा गर्दै भने । नियम कानुनमा रहेको कुरा कार्यान्वयनमा ल्याउन तथा प्रक्रियागत हिसाबमा जान सरकार सदैव सकारात्मक रहेको उनको भनाइ छ ।
हालसम्म विभिन्न कम्पनीका तीन सय दस ओटाभन्दा बढी सार्वजनिक बस पञ्जीकृत भइसकेका छन् भने उपत्यकामा चल्ने साना ठूला सवारीले पञ्जीकरण गर्ने क्रमजारी रहेको अर्यालले बताए । अहिलेसम्म दर्ता गर्न अटेर गर्ने समितिहरु आगामी साउनदेखि स्वतः खोरजीमा पर्नेछन् । तर, ती समितिहरु अहिलेसम्म पनि विभागमा पञ्जीकरणका लागि नआएको प्रवक्ता अर्यालले जानकारी दिए ।
यातायात व्यवस्था विभागका अनुसार हाल एक सय ८३ भन्दा बढी कम्पनीमात्र दर्ता भएका छन् । नियमअनुसार आगामी आर्थिक वर्षको सुरुमा नै सबै समिति कम्पनीमा जानै पर्छ । साझा, अन्नपूर्ण, अटोवेज र बाबा गोकर्णेश्वर यातायातले कम्पनी मोडलमा पञ्जीकृत हुँदै सेवा दिएका छन् ।
यस्तै, चुरियामाई यातायात, घोडाघोडी, बालाजु तारकेश्वर ,मयूर यातायात, हेलम्बु, महानगर यातायात कम्पनीअन्तर्गत सञ्चालन गरिएको यातायात व्यवस्था विभागले जनाएको छ । १५ ओटाभन्दा कम बस सञ्चालनमा ल्याउने ७१ ओटा कम्पनी रहेको विभागले जनाएको छ ।
